Read Alladian JOB 2 Bible Online

JOB 2 - Alladian bible

JOB 2

¹Shédíke oo kídíke, RUUTUMke keralo gíkan sudí longe píílang kula, buluke píídum sudokuem, buluke aralo Soitankom aamín getoku.

²Delo RUUTUMbí bíme, “No kolokda aadune?” emla ííto. “Ngo tani amonglo maying-goola aadung,” emla Soitanbí poyansuto.

³RUUTUMbí Soitanme poto, “Ngome agér ibina Jobme no kaadunía? Tani among araso bík kísana míngkesuna, delokke aina ami kamang. Bí Shédíme pesola atímana agérem ansula imanako. Atí legang kamape, tong-aryangem no bík teyolo ilíkdope ngom elík motuakom bí agíke míngkengem edíírupe bomdung.”

⁴Delo Soitanbí poyansuto, “Asig-adín ayanpe asig-adíne! Tanie agíke yénam legape ato-siro takamem mepak ladung.

⁵Nok alage leelík dola bíkke amíl-adín delo atímangem iket líkkítoka, delo nom arope nokke atuk-migmo delo béélíkyé.”

⁶Delo RUUTUMbí, “Aiyé, bí nokke alag aralo kadung, idola bím petmapeka,” emla Soitanme poto.

⁷Delo Soitan bí RUUTUMke kerang delok gítoku. Bí gílang kula Jobke alelok ila tukku loope, amíl tabunglo kina tasutpe bukpíímoto.

⁸Delo Jobbí gíla metbulo duula kilíng betlop kolok oksunala ito.

⁹Bíkke mime, “No supak peteng nok míngkengem edíípe bomdunía? Shédíme bééla sitola,” emla Jobme luto.

¹⁰Job bíme poyansuto, “No aapí-aang deemana amipe agom-aange podung. Ngolu ainam petom emía Shédí kíng paayén? Shédí kíng atímang emte paamayénía?” Sikepe Jobbí deddína atung-aréngem paalate, bí Shédíke mirupe agom lumato.

¹¹Edílo, Teman luune lokke Eliphaj, Shuah luune lokke Bildad delokke Naama among lokke Jophar emnam Jobke angong angumde, Jobke atung-aréénamem tattodí, bulu pobosula, Jobme aapí edíng dope poyilpe agí ekumlok gílento.

¹²Bulu mootenglok Jobme kaato, idola kangkénmato. Edílo bulu kangkén tokudí, bulu kapla-rííla, ankílok agí ege-galugem bétla, buluke dumpolo demulem ellumsula ito.

¹³Depe irodem bulu longe yoh kíníd kokai Jobme lupo-manmo sumape bíkke yagorupe atung-arééem kaala duuto.