Read Alladian JOB 20 Bible Online

JOB 20 - Alladian bible

JOB 20

¹Naama among lokke Jophar bí poyansuto:

²Nokke agom kídísi ngome hakjém molayimang ila, ngo poyan sudungku.

³Nokke ponam kídísi popu-polé agome, idola ngo deme poyan suladung.

⁴Konnyi-mennying among so kerayalumpe edílo tanieme melíktodí,

⁵atímana amie edílokom oolko ashéla yékína kamang.

⁶Bí bottela yagorupe sisala, taleng telokke doomuglo bík dumponge tubda suduakom,

⁷bíme demul kísa mutpak dungku. Bím kénna kídíe bíme maram yéku.

⁸Bí yoh immang kísa nyokyéku, delokke edílokom bím kaayimayé.

⁹Bík dungko delok bí nyokyé;

¹⁰delokke opanlok bíkke rotnam kídíem bík oo kídíe yébomyéku.

¹¹Bík amíle edííla yaamé tuakom, menape de kédéngpe iyéku.

¹²Atímanade bík nappalo tiiduakom, nabbél aralo bí menyok duakom;

¹³bí deme gímo kuimape iduakom; bí deme nappang aralo umgap tuakom;

¹⁴bík apim kídíde akiilo emope iyéku, tabí asum-aarpe bík amíllo iyéku.

¹⁵Bíkke doppyonam sérangdem bí abatpe batlen yéku, delokke bíkke akii daadilok Shédíbí laabín yéku.

¹⁶Depeila bíkke tíínam tetede emope ila, tabí pakanam kísape bím simoyéku.

¹⁷Gakír elang ngutlange korope biinamem, bí edílokom kaapang kumayé.

¹⁸Bíkke usikpe inam tabungdem bipak kunape iyé, bíkke ekuserang teyolo bí dodíku kayimayé.

¹⁹Kapeila bí opanem irééto, delokke akonke kumte-raatem bí lííbito.

²⁰Bíkke mííta-haktadem bí ipíng sulamayé, delokke bík ekuranglok bí ipít sulamayé.

²¹Bíkke dope-tíípenam atí kaimayé, bíkke miremde nyokyé.

²²Bíkke utepooroe kadukdí delo gíímang-gérmange aabomyé; dekepe eerípe aabomyé.

²³Bíkke akiiem dobísurongem, Shédíke marname aabomla, bík teyolo ojét bomyé.

²⁴Bí arem yoksem pesola dugge dokom, bíme pitol yogmoe apyédada.

²⁵Bíkke amíllok asirna yogmodem hatbín sutuakom emoe dígbomla, bí pesorían alongla yéyé.

²⁶Bíkke ikumnam sérang takamlo, tanike ilíkmanam eme aabomla, bíkke takam atoem gukutyé,

²⁷Teyong amonge bík paabem lengkanyé, delokke tani amonge bík mirolpe rolsa bomyé.

²⁸Shédíke marnam puumulok, bík mirem takamdem nyokyin moyéku.

²⁹Simin atímana amike pangkupenam atoe, delokke Shédíke ruulíknam amane.