Read Alladian JOB 21 Bible Online

JOB 21 - Alladian bible

JOB 21

¹Job bí poyansuto:

²Nokkíng ngo aapí edíng gedope sim rogudung, ngokke agom kídí sime aiyope tatbilangka.

³Delokke ngokke poyin rongem lupu-lulé tokuka.

⁴Tanilo ngokke lumín si kamang. Aapí hakjémem gebong sunamde igíngko kasudung.

⁵Ngokke amíl-amoem kaala, míírí-míínyope míítola, delokke nok nappangem alaglok pobum sutola.

⁶Ngokkíng sikepe inamem ngo míípa suyékuem, ngo iikume rek-rekpe míídungku.

⁷Kape Shédí bí atímana amiem, dítak bojéko turmola mirem mokan?

⁸Bulu oten ome-ue kaala sisa dope kapeila ikan?

⁹Buluke ekumlo Shédí bí dírí-kenoem bomamang, delokke bulu pesoríanla duumang.

¹⁰Buluke bomnam taro kídíete aiyope yéta sugola, kinam-ramnam kamang.

¹¹Buluke ome-ue iman-isan igola,

¹²miri-tapunglo paksong soola,

¹³atí kinam kamape ai-kampope, aapí eetetrupe yédak.

¹⁴Bulu Shédíme asoope bulum yésumo dope lupaksula, bík bedanglo yélímape idung.

¹⁵Bulu Shédíme matamang, delokke kumnam koteng míípamang.

¹⁶Agí ralnamlok ato takamem ipíí suto emla bulu podung, idola buluke séguem ngodan torík sulamang.

¹⁷Atímana amike lémem mutmit kítun? Bulu akon pagekom dug-adírem pangkítunía?

¹⁸Shédí bí marla buluke teyolo iré kítun, delokke bulume ampeeme kabbínnam kísa itun, demangkom gumnam asare demulem mutkutnam kísa ikítun?

¹⁹Abuke paab legape ome-uem iré dungku emla no mandung. Idola ngo míídung, buluke agí paab legape bím agíem kénsudope, bíkkíng Shédí bí itung-irépe aido.

²⁰Paab ina ami kídíde agíke atímang ireme paape aido, delokke Shédíke marname bulukíng kape aido.

²¹Tanike yénam longeme yéyin rongem, bík agíke ome-oo kídíem ankítuakom kape ilayékun?

²²Teyong among telo yéna kídíemte, kebang baabomna Shédíme tanie luyil layénía?

²³Akon amike siduem, amíl-amoe edííla, gai-gakongrupe ila,

²⁴bím kuséréng nyolíkla, deemang takot kamomape idung.

²⁵Ami akonde atí aina paamape, aré-anyola sidung.

²⁶Idola annyi pakde akampe sidung, annyidem akampakpe yudung, delokke tapume dodungku.

²⁷Ngo nokke uyu-suki aapí gela, ngome menakope míírepnamem ngo kéndung.

²⁸“Ingkoloi gai-gakona ami lokke ekume? Ingkoloi atí manake duupome?” emla supak no íídung.

²⁹En-gong-gígona amiem no íngkímanía? Buluke legang pobinamem tatbi kímanía?

³⁰Shédíke marla itung-irédí longelo, atímana amide agínpe ai-kampope yélatdung.

³¹Atímana ami bím gomnying luketna kamang, delokke bím atímape iyan sukuna kamang.

³²Edílo gairupe pírbumla kampona agolo bím yudope joobom yédí,

³³delo mití-maglínge gímín gela, kédéng ete bík amíl teyolo mííbadung.

³⁴Idola no bopol agomlok ngome luyilpe imapeka, kapeila nokke poyansunam tabungde mename.