Read Alladian JOB 22 Bible Online

JOB 22 - Alladian bible

JOB 22

¹Delo Eliphaj bí poyansuto:

²Tanide, delokke kénnarung tanikope itokom, Shédíke agér aanape idun?

³Nokke aipe inam deteng Shédíme agér bidun, demangkom nokke aina ségu deteng, Shédíme ashéng modun?

⁴Nokke airupe yénam legapía, demangkom Shédíme pesola yékología Shédí bí nome ludun?

⁵Dekemang, nokke paab legang pemin, delokke nokke atímape yénam legang pemin bí nome idune.

⁶Atí legang kamape bíro kídílok no ajéng laato, delokke bulume ege-galuk gepenam kaimadupe, no bím rotbínto.

⁷Asi tíílínem no bimato, delokke kenonem, no donamem domomato.

⁸No, nokke pauar emlang nokke midu-miramem ilíkla, among tabungem laayinto.

⁹No mime meyéng kídíem igulmape, delokke ayanpe ane-abu kaimana ome-oo kídíem irééto.

¹⁰Depeila menape pesoríane nokkíng aala, diimí-oor kana kobunge nom gargo bomkai.

¹¹No kaapayimadope dekede yagorupe kaamola, nome gargong bomla asi puumupe, nome eelum bomkai.

¹²Kedonyalumna teyong among telo Shédí bí duula, kedonna takar kídíemte kaatok suman?

¹³Idola no podung, “Shédí bí ingkoko kéndun, bím doomuge gyalum bomdung, iname kapekísa bí ngolum kebang lubi layén?

¹⁴Bíkke taleng telo gígong dungem. biisamna doomuge bím kaamomang.”

¹⁵Atímana ami kídarke bedalo noteng gíladunía?

¹⁶Buluke ale tukengem asi puumupe eebomkai, delokke buluke longe píímang adapekai, bulu nyokkai.

¹⁷Bulu Shédíme, atí ilamanape míípakla, arope míímape yéto.

¹⁸Idola Shédí min bulume mirem motuane; iname atímana buluke aapí-aangem ngo kangkénmang.

¹⁹Edílo atímana amiem ingéédudí, aina ami elang atí kénmana bulu ngilkado.

²⁰Atímanake bomnam takamem nyokyinmola, emelok gunyok modung.

²¹Ato takamem Shédí kíng melík geyéla, bíkkíng aapí eetetpe mííla yébosutoka; delomin ainame nokkíng kayéne.

²²Bíkke luyil-poyilem talla, nok aapí delo bík agomem mesiitoka.

²³No Shédí kíng aalat sukumílo, nome aimoyéku.

²⁴Nokke ekum aralo atímang inamem kaimadope ikumílo, nokke gairuna uunem, korong rumkílo, yunyok kumílo,

²⁵delok ayanpe Shédíme nokke uunpe, delokke nokke nogdipe imokumílo,

²⁶delo no Shédíme míngkesula agínpe yéyéku, delokke Shédí bí nokke ashéng leríngpe iyéku.

²⁷Nokke kumyém bí tatbiyé, delokke nokke pésunamem no mesiisuyé.

²⁸Nokke agér takamdem aipe ipííyé, delokke bí nokke bedanglo angunpe ibiyé.

²⁹Míngkím sunem Shédí bí omap modung, delokke aapí remyaknem bí singon modung.

³⁰Bí imem atí kénmanem mopítdung, nokke alag kídíe deenam legape nome mopítyé.