Read Alladian JOB 23 Bible Online

JOB 23 - Alladian bible

JOB 23

¹Job bí poyansutoku:

²Silokom ngokke ebínpe mannamsi kosangdung; ngok sigínko teyolo teng bíkke alage tebegdung.

³Ngo bím mapaaduamílo, ngo bík dungkolo gíladuamílo,

⁴ngokke legangem popasula, bím ngo pelmín suduape.

⁵Delo bíkke poyansunamem tatla, elík baapenamem elíkla iyape.

⁶Bíkke ralnam takamem lengkanla, ngom itumduadí? Ngok mííname bí depe imayépe.

⁷Jonna amie bík keralo legangem pokan sulayé emla ngo míídung, delo ngok ainamem kaala; ngome agínke legape ipítyéku.

⁸Idola sanggodanpe gídokom bím paamang, delokke anggodanpe madokom bím mapaamang.

⁹Bí línggíng telo agér idokom, ngo kaapamang; bí sokkodanlo yédokom, ngo kénpamang.

¹⁰Idola bí ngokke bedang gíkuem kéndung, depeila edílo bí ngom ikang yédí, delo uun kísape bí ngom paayé.

¹¹Kapeila bíkke lekor kordupe ngo gímín geto, delokke gípel-gíyélmape enmín geto.

¹²Bíkke nappanglok lulígnam loge ngo anguyanglo manyok gemang, delokke bík agom-aang kídíem yume-roh donamem botteyape mesiito.

¹³Idola bí angu-ayamang, sékoda bíme dakrík suyén?

¹⁴Ngok teyolo bíkke ukumlíknam akorpe iyé, delokke dekena atoeke bí ruula meyintung.

¹⁵Depeila edílo ngo sike tabung sim míípasuyédí, ngo pesoríanpe míídung.

¹⁶Shédíke dekepe pesorían dope ngome inam legape ngok aapíe dankai.

¹⁷Idola ngok migmoso eerína yoe bííbom dakkom, dekena kaamo yohde ngokke ebín-ebon manbom namsim itummayé.