Read Alladian JOB 24 Bible Online

JOB 24 - Alladian bible

JOB 24

¹Shédíme arope kénna kídíe mííbom dope, kape bí íngkí-bengkídí longeko ruulenmane?

²Tanie rísu lísigem ine-siodo, delokke pyootonam mérem bulu agíke mér-alunglo meyél sudoku.

³Ane-abu kaimana koo lokke gadoem bulu goonyok bidoku, delokke meyéngke rubo ajéngem dorkuma tetelo untape bomdo.

⁴Kaabomna kídíem dugnyok modo, delokke opanke paapenamem itumdo.

⁵Moonam gado kísa opan-aréne, yépol-mooruklo agíke ome-oo doga legape magoola yédo, idola mapaamang.

⁶Bulume ami-miyingke amonglo arígem imodo, delokke atímanake ríksénglo ali-ayém itamodo.

⁷Bulu ege-galuk kamape yoem ipdo, delokke ansingem gekomsunana kamang.

⁸Bulum dííte-moopang lokke pedonge balkyakla, delok bulu duupísupeko kamang kolok líídung agép-aréplo, tosik-toriksula idung.

⁹Ane-abu kaimana ome-uem umla, opan-arénakem ajéng ayanpe bomdungku.

¹⁰Opanna bulu amíl araape gígoodung, bulu gatkumnam aliem joolate dopenam kamang,

¹¹bulu olib tél emlang onggur ayém alangpe kéllendung, idola bulusu tíílíng kenola yédung.

¹²Doolunglo tarí moketnam kídíe sipe emla ulo goglateng, Shédí bí bulum kaasumang.

¹³Angunem mepakna amie kadung. Bulu angundem kénkípe emlateng míímang, delokke angunke bedang lokteng gíkípe emlateng míímang.

¹⁴Longe gírongem, doppyola mokagoona kídíe, gerepla opan-arénem líípe emla gídung.

¹⁵Abír-ayo ine kaamo-paang rísuem kaatíla, bík migmoem ilumsula, “Sékote ngom kangkén mayé,” emla míítídak.

¹⁶Kaamolo ami kídíe doppyong goola, longeme asoope ruusisula, bulu edílokom angunke bedangdem matamang.

¹⁷Buluke legape kaamo-rurugna yohde, roh ngargo kísane, delokke kaamoke pesoríandem bulu angongpe idung.

¹⁸Atímana amide asi teyong lokke siput kísane, buluke amongde tong-aryange bíídung, depeila buluke among delo sékoteng arík imang.

¹⁹Kapekísa pamkie lang erenge tapamem yolmodudí, dekekísa paabna amidem agoe gagdungku.

²⁰Bíme onete kénsuyimayé, bík teyolo tapume ashéng bomyé, depeila bí teeletnam esing kísa olet dungku.

²¹Bíkke dekepe igangkude kapeila bí, meyéng emlang negenem irééto.

²²Shédíbí agí ralnamlok botte-hanena kídíem nyokmodung, delokke bulu gai-gakongpe yétuakom bulu sidungku.

²³Bulume ai-kampope turmoduakom, Shédíke amige bulume kaatíbomdung.

²⁴Anyong moodí legape bulu gai-gakope yéyé, idola bí ííng kísape menape rugyéku, delokke ambeng gattungnam kísa bulume iyéku.

²⁵Sikepe imang emla séko polayén? Ngokke agomem mename emla séko lengkan bilayén?