Read Alladian JOB 27 Bible Online

JOB 27 - Alladian bible

JOB 27

¹Job bí poyansuto:

²Ngome aipe kebangem baabimape, ngokke aidem kosadope ina, Ralya yalumna Shédíke amínlok ngo pésudung.

³Delokke Shédíke ngome ngamodu tetesim,

⁴ngokke ayosi edílokom memayé, delokke ngokke nappasi edíloteng yatmayé.

⁵Ngokke sidoloope ngokom ainamem ludan tetesuyé, delokke noluke agom kídíde aroe emla edílokom tolíkmayé.

⁶Ngokke tukku-pinnyosi deedu tetedem, ngokke ainamem edílokom topaksumayé.

⁷Séko buludí ngome lupésula akdudí, bulume atímana, deemana amike kísa ankang sumodaklangka.

⁸Edílo Shédí bí bím míngke sumana amike yénamem layékudí, delo buluke míída subompenam kadunía?

⁹Bulukelo ankí-kenoe pííyém, delo Shédí bí bulum tadbidunía?

¹⁰Bulu Shédí kíng ashéyédí? Shédíme bulu agínpe kumyédí?

¹¹Nolum ngo Shédíke bottena pauarem luyilyé, delokke Ralya yalumnake míínamem pobiyé.

¹²Idola ma, ngo kape sikepe bopol agom poyén? Kapeila nolu agísue kaayinsukai.

¹³Atímana ami, migu-miyak amiem, sikepe Ralya yalumna Shédí bí iréédungku.

¹⁴Bulu deddína ome-ue katuakom, dekede dopa-tíípamape yéyé, delokke midu-mimaklo siyinyé.

¹⁵Delokke yépíísuna demte kilii-ramlie dobomyéku, delokke buluke meyéng kídíete buluke simang teyolo kabbommayé.

¹⁶Bulu sanla yimanam gumí-dogínge katuakom, ege-galuge katuakom,

¹⁷buluke mesing namdem deena amie bomyéku, delokke aina amie atope ibomyéku.

¹⁸Atímana amide ekum kídíem, mopí-tarum ekum kísa modung, demangkom arígem kaabomna abíllok ekum monam kísa idung.

¹⁹Bulu miremna kope ipkolo ibaang tuakom, edílo bulu gerep yékudí, delo takam mireme nyokdope kaasuyé.

²⁰Puumu toknam kísa pesoríane aabomyé, gumnam-lamname yoh atello muda bomyé.

²¹Sanggo asare buluke ekumlok, bulum mutpak bomyé;

²²Bulu deddípe runyok gepe ituakom, atí ayang kamape bulum mutjém-muyyém bomyé.

²³Buluke dugge dungem asare mutpak bomla, sipe-nyokpe kolo pesorían moyé.