Read Alladian JOB 28 Bible Online

JOB 28 - Alladian bible

JOB 28

¹Baldín koolenko arunge kadung, delokke uunem kampope yolmokue kadung.

²Tanie kédénglok koola aremem ilendung, delokke elíngem yolla tam aremem illendung.

³Tanie dééyin-déérang belo kootokla, delo magoola, koilangem kaamoko elíng aralok kootagoodo.

⁴Tanike ale tukímangkolo, tani kamang koloteng, koilangem kootagoola agí atelpe agér isula, arunglo paktok líknam rímolo bídasula idung.

⁵Kédénglok donam-tíínamem ilendung, idola dekena kédéng rumkíng delo, takamem eme gukutdung.

⁶Kédéng arangke líídung kídarlo, punna saphir elínge kadung, delokke kédéng lokke demullo uune kadung.

⁷Dekepe agér iko arung ara delo, mísunge yobang kímang, delokke ingkona sogumete yobang kímang.

⁸Dekena bedang berom delo, ingkona myomure lang monkír kídíeteng gíang kímang.

⁹Tanie tolna líídung-líírengem koola, díítemte dungkolo duumoyimape idung.

¹⁰Líídu-lííreng aralo kongayéme, gaina angun-abéna elíngeme paadung.

¹¹Tanie asi lenko loope konggoola, arang atoem angunlo laalendung.

¹²Idola ingkolok gyandem paayén? Ingkolok ngolu kénnamem kénlenyén?

¹³Tanike aralo gyandem mapaamayé? Delokke gomroem sékote kénna kamang.

¹⁴Bottena siyéng, delokke eeríko siyéng kídíete, bulukíng gyande kamang emdung.

¹⁵Gyandem arem tadok lokteng relamang.

¹⁶Gaiyalumna uun elang lunggu-tadok eteng delokke areme adap aloomang.

¹⁷De uunem pemílo are kayadung, delokke asirna arsi, delokke uun pekingem pemílo are kayadung.

¹⁸Gyanke arede, koral, delokke jaspar elíng, demangkom asirna rubi elíngem pemílo bojéyadung.

¹⁹Gyan deme gairuna topaj elílokla deengko-deengkina uunlok relamayé.

²⁰Dekemílo gyanke leeríde ingkolo? Kénnamke lenkode ingkolo?

²¹Pettang yopgoone kom deme kaamang, delokke turna atí takamekom deme kénmang.

²²Siname lang doorum-líísam amongete gyandem, “Delokke legang ponam petom eke ngolu tatdung,” emla mandung.

²³Gyan deme, delokke bíkke dungko deme, Shédí petom min kéndune.

²⁴Kapeila taleng rumkí sokke ato-siro tabungem bí kaalangala, tani among iríloope bí kénpíng-kaapíngne.

²⁵Edílo Shédí bí dooyi asarem ralnamem bila, siyéng lokke bodong-bortagem ruulentodí,

²⁶edílo Shédí bí pedong opekuem ruubila, doomír-yaari gípekuem bedang mobila itodí,

²⁷delomin bí gyandem kaala, delokke arem ikangkíla, gyande ainako emla tolíktone.

²⁸Tanime Shédí bí podung: “RUUTUMme pesonamde gyane, delokke atímang kolok míílat sulangkula yékunamde kénname.”