Read Alladian JOB 29 Bible Online

JOB 29 - Alladian bible

JOB 29

¹Job bí lekoda potoku:

²Shédíke ngome kaabom dungem, ngo kapekísa yétuadí, dekepe ngok yéname itokuamílo airuyai.

³Delo Shédí bí ngokkíng yétímíntuai, ngo kaamolo gídungem bí ngokke angunpe ito.

⁴Delo Shédí bí ngome angongpe ila, ngokke ekumem kaabom bila, ngo mite-mirempe yétuai.

⁵Ralya yalumna Shédí bí ngokkíng kala, ngokke ome-oo takame ngome gargo bomtuai.

⁶Ngokke gooru-sobéne deddína gakírem lenbituai, ngokke olib esinge elíng kakoloteng turtuai.

⁷Doolung lokke miro kídílo ngoteng duumín getuai, delokke kebang lumín getuai.

⁸Ngome mínggela yaamé koo kídíe, ngom kaarík suyém gígéé gela, abu-mine kídíete darep gebila ituai.

⁹Ngom kaayéme doolung ruutum kídíe lupoem mepola,

¹⁰migom-mite teng asoope ibituai.

¹¹Ngome kaana tabungde, delokke ngok amínem tatna tabungde, ngome yidgela erkí geyintuai.

¹²Aatí-opanne roguyém ngo igulla, ane-abu kaimana oo kídíem ayatuai.

¹³Dug-adír runa amie ngom yidgetuai, mime meyénge ngok kelok ipítnamem paatuai.

¹⁴Ngo agínpe ailokla jonna bedalok gíto.

¹⁵Ngo mikmanake amigpe ito, delokke lebyanake alepe ito.

¹⁶Opan-arénake abupe ngo ila, duugna mibo-miying emte igultuai.

¹⁷Ngo ami mikír kídíke pauarem nyokmola, buluke iréénamem mopít bituai.

¹⁸Ngo deddína longem turpala, ai-kamporupe sidokupe míítíto.

¹⁹Ngo asilo appír pírala, aag kídíe aapam katína esingpe ituai.

²⁰Mipil-miyongpe ngom yidla, ngo amíle edííla yétítuai.

²¹Ngokke poyilem ami kídíe, asoope tadbila duutítuai.

²²Bulu agom potem penam kamape ngo pola, ngok agom kídíde pedong dopile kédénglo, rumlíknam kísa rumlíktuai.

²³Arík kídílo kapekísa arík ine pedongem toyadudí, dekekísa ngom toyala, ngok agomem ami kídíe torík sutuai.

²⁴Edílo bulu adírlok agíemte arope míísuyimape itodí, delo ngokke ngilla ernam agome bulume aapí edíng motokuai.

²⁵Ngo buluke bedangem mabila, maglíngem kapekísa roje gíbodudí, dekekísa ngo ibola buluke ankí-kenolo, bulum aapí iigangem ilen botokuai.