Read Alladian JOB 3 Bible Online

JOB 3 - Alladian bible

JOB 3

¹Méélam delo Jobbí agíke odí longem pésudola agomem lulen geto:

²“E Shédía, ngome odo longede nyokdak yika; íngkona yohlo ngome gelentodí, deme pédak langka.

⁴“Shédía, no dem longe dem kaamope imo langkuka, delokke dem longe dem míípasu moyimapeka, dem longe dem lekoda angun moyimapeka.

⁵De longede kaamue jingem eerína yohpe ilangkula, doomuge gyangkap bomla angunem nyokmo dakyika.

⁶Dem yoh dem kaamo ruruge bííbom langkula, dítak aralokke longe konpe kíyimape, poolo kídíke araloteng sapyimadope ilangka.

⁷Dem yohdem ashéng mana, kaamo rurugna yohpe imolangkuka.

⁸Séko buludí Lebiathanme [4] agom tatdope iladudí, bulu dem longe dem atímana kope idope imodakyika.

⁹Delok longe delokke roh ngargo takar kídíe, angunpe aimang, delokke yoh dem roh angunem kamo madakyika.

¹⁰Ngome atung-aréédope olenmona yohdem Shédí bí pédak yika.

¹¹“Ngo kapei ane akiilo simaton? Ngom kapei orípe olen maton?

¹²Ngom kapei lebínge peldola ane botone? Ngom kapei bík anyunlok suntone?

¹³Ngo delo situamílo, supak aiyope apééla duuyai.

¹⁴Supakke kumrukpe ikuna ekum kídíem mona, konnyi-mennyingke ruutum kídí lolang roja kídílo lekope ipla dooyai.

¹⁵Agíke ekumem nogdi, uunlok ibíngsuna ruutum kídílo lekoyai.

¹⁶Demangkom longe kénkímana, orípe onam kísa ipyai.

¹⁷Sirongem atímana amie agér ilayimang, delokke agér ingéésuna kídíe, apéénamem paadung.

¹⁸Patek duunete aapí eetedem paadung, agér ruutum lokke lunamem tatyimang.

¹⁹Sirongem amé-bottene, abíl kídíe, mipil-miyonge asarpe yédung.

²⁰“Kape ankí-kenona amilo angun kakan? Kape tanie ankí-kenola yétíyén?

²¹Bulu sinamem toyadung, idola de aabimang; bulu ekuserangem pemílo, agoem mííyadung.

²²Bulu sila bulum yuma tetedem, bulu ashémang.

²³Buluke kerangem Shédíbí rumnyokdung, delokke buluke luyu lamgéem, etorpe torgodung.

²⁴Donam-tíínam ayanpe dug-adíre dada ila, ngok duge edílote nyokmang.

²⁵Ngokke pesola yirí-pedípe mííname, arope aayindung.

²⁶Ngokkíng aapí eetet kamang, apéé kamang, delokke ngok ankíe edílote kíyinmang.”