Read Alladian JOB 30 Bible Online

JOB 30 - Alladian bible

JOB 30

¹Idola supak ngom aníyang kídíete, luber-luyérla lukaadung. Buluke abu kídíe loorímana amipe ila, bulum ngok mér sobénem kaabomna ekii loteng melík límatuai.

²Bulu amíl-amo rukkuna amipe ila, ngokke agérem atí ila bimato.

³Bulu yagorupe opanla, dope-tíípenam kaimana amipe ila, mongku-moorang amonglo, esing appír, delokke moonam engín matala yétíto.

⁴Bulu mooruk amonglo appír-ayé matala, siipí-siiyéme dogola yétíto.

⁵Doppyona amiem ngomla monbomnam kísa, ami kídíe bulume monbomto.

⁶Bulu dííte kídí lokke bupík kídílo dunggoto.

⁷Moonamlo bulu simon-sili kísape ngombo sula, pasum aralo bulu duubo sutíto.

⁸Bulu atí agér bimana yaana ami ekíai, depeila bulume amonglok monpaktuai.

⁹Supak dekena ami kídíde aala, ngome ngilkala buluke lubernana kope ngo ikai.

¹⁰Bulu ngome belumla, agíem megensula, delokke ngokke migmolo takil emteng sukkatdung.

¹¹Shédí bí ngome aré-anyodokupe ilangkula, buluke aklíngem ngome ranadung.

¹²Bulu alung-abampe aatíbomla, ngome dugge getímola, ngome bulu mimak iabomdung.

¹³Bulu ngokke duknyok peko bedangem itumla, bulum sékote lutumna kamang.

¹⁴Bulu ngokke yabgoem arung rungala, ngokke tukku teyolo ojém bomdung.

¹⁵Ngome pesoríane aabomdung; ngokke amíne asarpe gyanyokla, ngokke mirem amíne doomug kísa nyokkaku.

¹⁶Ngokke kinam sok aiyéku emla míísuyimang, depeila ngokke siname píídakbong.

¹⁷Díknam-marname edílokom iyindí kaimang, ngok along kídí takam site yoem yagorupe kitídung.

¹⁸Shédí bí ngome língluplok gagbomla, ngokke egem gekorpe gemoyimang.

¹⁹Bí ngom yupyalo yoplíkla; ngo akangem pemílo aiyamang.

²⁰E Shédía edílo ngo nom gogyédí, no ngom elíkmang, edílo ngo nome kumsuyédí, no ngome poyansumang.

²¹No ngome iré-sinyola, nok ralnam tabunglok ipusiléé aloodung.

²²No ngome gumnam-lapnamlo melíkla, asarem mutpak modung.

²³Takam amike gíkupeko sinamlo, no ngome langaadung emla ngo kénkai.

²⁴Atí looríyimana, ayang petomem roguna, atí ilamanalo, kape no mirolpe ikan?

²⁵Kaplí-rílína amilo ngo kapmín gemanía? ankí-kénona amilo ngo míídum sumanía?

²⁶Ngo ashéng emla angun emmin matadungan, idola delok ayanpe, kaamoe lang adíre aadung.

²⁷Kinam elang ankíe ngom pekpan sutung; delokke loodí kítpe ngo ankang along sudung.

²⁸Ngo migmoe beggípdola, doonyi angun kaayimape gígoola, ami kídílo igul matadung.

²⁹Ngo ménsurung kídíke bíro kope ikai, delokke pettun kídílo yémín gena kope ikai.

³⁰Ngo yagorupe kisadung, delokke ngokke asig-ayosi yorang kabong.

³¹Ingkolodí ngo longeko miriem lang ngildudem tattoadí, delo ulo gognam emla kabdud-ríídudem tatkaku.