Read Alladian JOB 31 Bible Online

JOB 31 - Alladian bible

JOB 31

¹Ngo belum-bekam aapí gedola mimumem kaamayé emla pésuto.

²Ralya yalumna Shédí bí tani ngolum kape idun? Tanike míínamem kapekísa kaapí bidun?

³Atímana inadem bí tong-aryang emla nyoknamem melíkdung.

⁴Ngok inam takamem Shédí bí kaatídung, delokke lekor takamem sanbomdung.

⁵Ngo sékomemkom yadmang, delokke atímape ikímang emla pésudung.

⁶Shédí bí ngome aina kínana kolok bekkítoka, delo ngokke deenamem bí kaapayé.

⁷Ngo jonna bedalok gípel tumílo, demangkom aimanalo ngo aamem tumílo,

⁸ngokke arík kídíe nyokpe aido, delokke ngokke ali-ayé ilíknamem abíd amie dope aido.

⁹Ngo kumríke ménglo aang olíkla, ngokke kumríke eyablo toyala kettumílo,

¹⁰ngokke mime, milo konke dopenamem ngiibi daklangka, delokke angukon milolo ketmín gedak langka.

¹¹Dekena atímanadem simope aido.

¹²Ngokke ato-siro takamem doorum-líísam lokke eme nyokyinmope aido.

¹³Edílo ngokke béérang kone ngome duugnamko popasuyédí, delo ngo aiyope bím tatbila kebangem baabidungku.

¹⁴Depe ngo imamílo kapekísa ngo Shédíme kaaríksula, bíkke ngome íngkí-bengkípe emla aabomyém ngo bím kaarík sulayén?

¹⁵Kapeila ngom pílenna Shédí atelmin, ngok béérang kídíem kom pílentone.

¹⁶Ngo edílokom opanem igulmape imang, delokke mime meyéngem aréé momang.

¹⁷Ngokke dodo-tíídoem ane-abu kaimana ome-uem akii kenomola imomang.

¹⁸Ngokke yénam tabunglo deke takamem ila yéto.

¹⁹Edílo ami akone agíke ege-galugemte, rela sumadope ngo kaatodí,

²⁰delo ngokke agíke mér kídílok ilennam, amíd kana ege-galugem bisutuai. Delo bí yagorupe ashéla ngom yidtuai.

²¹Ngo kebanglo lukumyé emla míídola, ane-abu kaimana ome-oo konem yattumílo,

²²ngok amíllok péklenla, ngok alage dírka langka.

²³Kapeila Shédíke ajéng langku penamdem ngo pesola, dekena agérem ikímang.

²⁴Ngo edílokom ngokke miremlo,

²⁵demangkom ekuseranglo míngkímsula, delokke míídasula yémato.

²⁶Asirna doonyi emlang angunna pooloem, ngo edílokom kumsu kímato.

²⁷Bulume yidgela demangkom mumpupla ila, ngo agíem dekepe yatkosumato.

²⁸Dekena paab inem petpakpe aido, kapeila dekede Ralya yalumna Shédíme míípakdung.

²⁹Edílo ngokke mirue dug-aréyédí, demangkom bulu gíímang-gérmang kayédí, dekeloteng ngo ashébommato.

³⁰Bulum nyokdope emla ngo kumla, dekena paabem imato.

³¹Mibo-miying kaarík sukoloteng, ngo kera-nappang iríkla inamem ami takame kényindung.

³²Ngo en-gong-gígonem ekumlo tomala, domola ito. Bulum bedu-bedalo ipgomomato.

³³Angu amie buluke paabem rumnyok sudung, idola ngodan edíloteng dekepe ikímang.

³⁴Ngo amike lupu-lulé, delokke luge-poge namem peso annyingla, ekum aralo duunyokmato.

³⁵Ngok agom kídar sim nolu tatna kamanía? Ngo aroem podung emla ngo pésudung; Ralya yalumna Shédí bí ngom poyan sulangka. Ngo pori ripadope miru kídíe ngokke legangem atla bomduamílo,

³⁶ngo mííyumsula dekedem ngo lunggu pelang dumluppe, takame kaadope geyai.

³⁷Ngokke imem tabungem Shédíme popasula, ngo dumponge ngemonla yéyai.

³⁸Ngokke arík ibomnamde, akonlok atímape rotnampe inam komílo,

³⁹arík delok lenna ali-ayéme ngo atel dosula, delo agér ina kídíem bisumape itumílo,

⁴⁰delo arík delo ali-ayé ayanpe, tang genelang aamsue, delokke ííng kídíe buklangka. Sikepe pola Jobke agom kídíem poyinto.