Read Alladian JOB 32 Bible Online

JOB 32 - Alladian bible

JOB 32

¹Job bí agíke deenameme arorupe kísu kolok bulu midum angumde bíme luposuyimato.

²Idola Jobke agíem gairupe mansula Shédíme loorímangem políkla inamdem, buluke anín delo dagamínna Elihu emnamde Jobke teyolo aklíng alongkai. (Elihu bí Ram emnam opín lokke Bujke otíng Barakelke ue.)

³Bí Jobke angong angum deloteng aklíng bomto, kapeila bulu Jobme atí poyan sulayimang kolok Shédíme imem nakope buluke ségu kídíde imokai.

⁴Elihubí buluke aralo aníyalumpe ila, bí pomín gemape asoope buluke poyinem dagya yatíto.

⁵Edílo midum angumde Jobme poyan sulayimape ikadí delo bí marto.

⁶Delo Bujke otíng Barakelke oo Elihubí poto: Nolu mijingeke delokke ngo yaamé kooko, depeila peso annyingla pomín gelamato.

⁷Nolu abu mine kídíe kénnamlok luposupe aido emla ngo mííto.

⁸Idola Shédíke aid bímin tanilo aala gyanem bidune.

⁹Tanie abu minekai emkope delok, kénnam gyanem kayamdung emnammang; delokke luji-pojidung emnammang.

¹⁰Iname ngokke popenam kídar simkom nolu aipe tatbilangka.

¹¹Noluke lubosunam, delokke kénnam agom kídíem pobo sudungem ngo tattíto.

¹²Ngo airupe tatgap toname noluke aralok, sékoteng Jobme lumemne emlana kamangkai.

¹³Kénnam gyanem ngolu paato emla nolu manmapeka. Nolu luramkai. Shédí petom Jobme poyan sulayé.

¹⁴Job bí nolum min pomín suton, ngom mang, idola noluke ponam kísape ngo bím poyan sumayé.

¹⁵Bulu Job nome lupo supenam kaimang.

¹⁶Buluke poyan sulayimape iko delo, ngoteng asoope duutímín geyénía?

¹⁷Ma, supak ngo, ngokke popenamem pokansuyé.

¹⁸Ngokke agom-aang kídísim pomape ilayimang.

¹⁹Ngo pomamílo ayo gadum akulo aní apongem ríklíkla, bétkénam kísa ngo iyé.

²⁰Depeila ngo doola yimang, ngoteng agom pomín gepe aiyé.

²¹So pobo sukoso ngo séko kepeteng doomayé, delokke sékomete yidmayé.

²²Ngo depe iyémílo Shédí bí ngom menape itung-irélangka.