Read Alladian JOB 33 Bible Online

JOB 33 - Alladian bible

JOB 33

¹E Job, supak ngo ingkona agomem poyédí, dekedem airupe tadbilangka.

²Ngokke aapíso genamem popa bipe ngo míírusudung.

³Ngok agom tabungde pope-polemang, ngo aroem poyé.

⁴Shédíke aidlok ngom píto, delokke yénamem bito.

⁵No poyan sulayemílo poyan sulangka, nokke akmín supenamem míírung sutola.

⁶Kapeila no lang ngo Shédíke kangkolo akame, ngonyipak déngkyamlok pínam terenge.

⁷No ngome peso bompenam legayang kamang, delokke ngo nome rumkíngpe mííla pomang.

⁸Job nokke agomem ngo tatgapto, no sipe emto:

⁹“Ngo imem atí kamang, ngo deedung delokke paab kamang.

¹⁰Idola Shédí bí ngome atímape ikíteríla, mirupe bí ngom míídung.

¹¹Ngok alelo bí ikoli koglíkla, ngokke lekor miyongem bí kaatí bomdung.”

¹²Idola Job nom ngo podung, no pomemdung. Kapeila Shédí bí taniem botte yadung.

¹³Tanike agom-aangem tatbimang emla kape no Shédíme paklokan?

¹⁴Arorupe Shédí bí atí-atípe agom podungai, idola tanie tatkénmang.

¹⁵Yoh ipkolo Shédí bí immalo, delokke kaarí kaanyolo lengkansula podung.

¹⁶Bíkke ponamem amiem tatmola, bíkke lutornamem pesorían gedung.

¹⁷Tani bí paab imadope, delokke míngkím sumadope emla Shédí bí ludungai.

¹⁸Bí taniem nyokmolímang, depeila siko lokteng bí mopítdung.

¹⁹Taniem jonna bedanglo langaangkupe, Shédí bí kinam-ramnamlok tomadungku.

²⁰Kina amide dolí-tíílíyimape ila, gairuna donamemte aklí bomdung.

²¹Bíkke amílde atí kaimape rukdung, bík alongemte no kaapadung.

²²Bí depeila siko nyokko amonglo pííníndung.

²³Tanike yépeko bedangem lengkanna, Shédíke éjar teyong kotoki kídí lokke akone bím igulpe aala;

²⁴“Bíme ilentoku, bí siko-nyokko amonglo gímayé,” emla ayala bím pomílo,

²⁵delo bík amíle rallangkula yaamé yéku;

²⁶bíkke kumnamem Shédí bí tatbiyéku, delo bí Shédíme kumsula ashéyéku, delo Shédí bí bíkke bedangem jonbiyéku.

²⁷Delo bí, “Ngo aipe yémang, delokke paab ito, idola Shédí bí ngome mopítto.

²⁸Bí ngom siko-nyokko amonglo gímomato, depeila ngo supak turdungku,” emla ami takam tatkolo pogoyéku.

²⁹Shédí bí amilo sikepe letel petom mape, lennyi-lengumpe idung;

³⁰bí akonke yénamem mopítla, turnamke ashéngem bidung.

³¹Job no poyan sumape asoope, duupo dola ngokke agomem tatbilangka.

³²Idola no agom popenamko kayémílo polangka, ngo asoope tatbila aronem aroe emla nom elíkyé.

³³Delokke popenam kamamílo asoope idola, ngokke agomem tatlangka. Ngo nome gyan kadope poyilyé.