Read Alladian JOB 34 Bible Online

JOB 34 - Alladian bible

JOB 34

¹Nolu kénna kídíe lang gyan kana kídíe,

²ngok ponamem tallangka.

³Nolu dopona donamem dokí-dorung kolok dokéndo, idola gyan gompil kídíem tatkolok tatkén mado.

⁴Ingkuedí arodune delokke aidune, deke legangem ngoluke aralo pokí bosulaju,

⁵Job bí sipe podung: “Shédí bí ngome aina kebangem lubimang, ngo deenampe duulateng bí ngom kaabimang.

⁶Ngo arolok yétuakom, bí ngom menakope sandung. Atímana takot atel koteng ngokkíng kamangakom, bí ngome yagorupe tarí moketdung.”

⁷Shédíme atí mínggemana ami Jobke kísana ngo kaapamang.

⁸Bí atímana ami kídílo mííbo sudung. Delokke paab ina amilo angong bosulídung.

⁹Kapeila bí, “Shédíme ashédope ikídokom, delok tani bí atí aina ilenmang,” emdung.

¹⁰Nolu kénna kídíe ngok ponamem, aipe tatgap bilangka; Ralya yalumna Shédí bí imemyénía?

¹¹Tanike agér ikorlok bí amanem bine, mipilke paapesunam amanem paamone.

¹²Ralya yalumna Shédíbí séko memkom ipusilééla imang, delokke atímana agérem bí edíloteng imang.

¹³Shédíke ralnam pauar tabungem, akon logía paaton, demangkom taleng-kuppo sim kaabom dope sékoda bíme ullíktone?

¹⁴Shédí bí turnamke nganamem laabín kumílo,

¹⁵turna tabungsi sila demulpe iyin yéku.

¹⁶Nolu kénnekemílo ngok ponam sim tatgap langka.

¹⁷Deena Shédíme no kape lorímang emkan? Bí pénsam-raadang kebang lunamem akdunía?

¹⁸Edílo among ruutum kídíe lang roja kídíe loorímayédí, delo Shédíke alage buluke teyolo tebegdung.

¹⁹Bí takamem pílenne, depeila bí among ruutum kídíke peteng doomang, delokke opan kelang mirem kepeteng doomang. Bí akampe kaane.

²⁰Amiko lomlíksula yohlo silado. Ebín anyong koteng ibomsumape, deddípe midu-miram amiem bí mokadung; bíkke alag leejém kolok tanie nyokdung.

²¹Tanike lekor miyongem bí kaadung.

²²Shédíke keralok ingkona kaamoeda paab ina amiem rukap ladon?

²³Bí taniem íngkí-bengkínam legape moodí míímang.

²⁴Íngkí-bengkí kapomape kebang ruutum akonem, bí laabínla, delokke akonem langaala ine bí.

²⁵Buluke inam-hanamem bí kénla, yoh atellok bulum nyokmodung.

²⁶Takame kaayindupe bí paab ina amiem itung-irédung.

²⁷Kapeila bulu bíkke agomem tatmang, delokke bík lulígem igemang.

²⁸Edílo opan-arénem bulu ipusilééla, edílo renam ami kídíde bíkkíng kapgu-roguyédí, bí buluke rogunamdem tatbidung.

²⁹Shédí bí atí imayé emla mííyémílote, séko bím lukayén? Bík migmodem rusi suge míloteng, tanide atí ilamang.

³⁰Shédíme míngke sumana irééna kídíe bulum ruutum bomma dope, ingkona opín-buangekom mopít sulamang.

³¹Job no agíke paabem Shédíke keralo pondéésula, paab iyimayé emla pésuton?

³²Nokke imemem Shédíme sutkan langka, emla rogu kíton? Delokke atímana agérem iyimayé emla no míísi-míímo sutokun?

³³Shédíke inamem no akrodem, ingkona ainako no bíkkíng paayé míídon? No moko míngkí suyén, ngomang.

³⁴Agér-anamem míngkén sunade arope elíkyé, delokke kénna amide ngok ponamem talla sikepe poyé:

³⁵“Job bí atí kénmape podung, delokke bík agom kídíde tatkén penam kamang.”

³⁶Jobke ponam tabungem mííyin kítokuka, bíkke agom kídíde atel kokom aina kamang.

³⁷Depeila bík paab teyolo, bí mirolpe roldung, delokke ngolu takamke keralo Shédíme bí lupu-lulédung.