Read Alladian JOB 36 Bible Online

JOB 36 - Alladian bible

JOB 36

¹No aapíe hakjém dola anyongko,

²ngokke Shédíke ayanpe ponamem tatpong bitopíam.

³Ngom pílenna Shédíbí aine emla, ngokke elok-belokkai kénnamem nome lengkanyé.

⁴Nok keraso gyan kana aro rungko podung emla míílangka, kapeila ngo ingkoko poyédí dekede aroe.

⁵Shédí bí ralnarunge, bí séko memkom míípakmang, delokke bíkke kénmanam kamang.

⁶Bí paabna amiem aipe turmomang, delokke opan aréénem kebang lujon bine.

⁷Deena amiem mopítne, delokke bulum roja kísa imola, buluke amínem duuyarmone.

⁸Idola ingkona amiem bí ikolilok yéétudí, bulu agíke imem sulok ikai.

⁹Shédí bí bulume buluke paab emlang míngkím sunamem lengkandung.

¹⁰Buluke paablok míílat sudokupe, bí bulum lutorem tatdope idung.

¹¹Bulu agomem tatbila bulu agér gérbiyémílo, buluke yénamem mirem pelang eetetpe yéyé.

¹²Depe imayemílo atí kénmape silangkula, sinamke koorongem koodungku,

¹³Shédíme míngke sumanade buulíng-marlíngla yétídung, delokke bulum kénsudope Shédí bí nyorung etdokom, bulu iguldope kummayé.

¹⁴Buluke yéname lupum-lukam bomnam yénampe yépala, mimum-yaamépe idung adape bulu sidungku.

¹⁵Idola atung-aréélok Shédí bí taniem luyildung, delokke buluke amige kaapadope, ankí-kénoem melíkdung.

¹⁶Shédí bí nome ankí-kenokolok laalenla, nome ashéng-angamem ruubila, nokke dopom-tíípomlo doname bííbuto.

¹⁷Idola supak nokke paabape nome ingéédungku.

¹⁸Ansulangka, miremem no tumnyok kosumapeka, delokke sépsu-paasunam abalem yadko sumapeka.

¹⁹No kapla-rííla idokom agér biyimayé, delokke nokke ralnam kídí dete igul layimayé.

²⁰Ami kídar nyokdí yoe píítuamang emla míímapeka.

²¹Nokke ankí-kenosi nome atímalo aamadope emla melíkname; atímalo olíkmadope ansulangka.

²²Shédíke pauar bottenem míípa sulangka, bí botteyalumna agomem poyilyé.

²³Sékote Shédíme dekepe itola emla lulíg lamang, delokke bí atímang emla lulamang.

²⁴Bíkke igang-sagang tabulo bím yiddung, iname noteng bím yidge langka.

²⁵Bíkke irisinyo inamem tabunge kaadung, idola sékoteng deke delokke gomroem kénmang.

²⁶Bíkke angun-abéem ngolu kénpímang, delokke bík dítagem kíyin lamang.

²⁷Shédímin among lokke asiem laala pedongpe omokune.

²⁸Bí doomuglok pedong omola, tani takamlo aapame aadung.

²⁹Doomug gíkorem sékote kénmang, delokke doomír mírkorem kénna kamang; dekedem Shédímin agí dungkolok idune.

³⁰Taleng telo bí yaariem garkup-garlat mola idung, idola siyéng asi arangde kaamope idung.

³¹Sikepemin bí tanime donam-tíínamem ruubila domo-tíímodune.

³²Bí yaaridem alaglo gagbom dola, garlík pekolo garlík modung.

³³Doomírde pedonge aadak emla mírto gene, gooru-sobéne dekedem kéndung.