Read Alladian JOB 37 Bible Online

JOB 37 - Alladian bible

JOB 37

¹Doomír-yaarie ngokke aapí-aangem, dungkollo duumomape imodung.

²Bíkke nappanglok lenna mírdudem, bíkke ayolok lenna bukdudem tattola;

³bí yaariem taleng telo garkok mola, among kéényungkon lokke kéényungkon loope garlík modung.

⁴Delok méélam delo bíkke adudem kekímruupe, doomír mírdudem lang yaari angunem tatpang-kaapadung.

⁵Shédíke lulíglok kénpíng-kaapíng manam atíe idung, ngoluke tatkén-míngkén manam irisinyo agérem bí ikandung.

⁶Bí tapamem odope lulígla, delokke pedong dojégem amonglo yagorupe omola ine.

⁷Depe ikolok bíkke pínam ami tabunge, bíkke agérem kényindope, tanime bí agér-anamlok itum podung.

⁸Simon-sili kídíe buluke dungkolo runyok gedungku.

⁹Gumnam-lamname sokko danlok saado, delokke rekyamna ansinge línggíng danlok tokdo.

¹⁰Shédíke nganam asare asieme pamkyak modung, delokke dekedem tolmola tapam pamsoope imodung.

¹¹Bí doomuglo aapamem gyayél sulíkla, bíkke yaariem elo-belo gargo modung.

¹²Bíkke ruutílok dekede among tabunglo gyanggola, bík lukampe iyin goodung.

¹³Taniem itung-irénapeteng bí doomugem langaadung, delokke ayangem lengkan peteng asiem langaadung.

¹⁴Job no anyongko tekídola tatgap potola: Shédíke irisinyo inamem míngíng kítola.

¹⁵Doomugem kapekísa Shédí bí gagbomla yaari garlen modun, deme no kénmanía?

¹⁶Shédíke irisinyope doomugem asarlo gyadupe inamem no kéndunía?

¹⁷Sokko belok ereena asare mutla, no pamki petomem min kéndune.

¹⁸No Shédíme igulla taleng tesim asirna, tolna, delokke atagna arem abor kope ilayén?

¹⁹Shédíme kape emmíloi, deme ngolum poyiltoi; ngoluke aapí si araadung; ngolu atí popenam kamang.

²⁰Shédíme luposudope ngo komayé, kapeila bí ngome nyokmodope ngo isumayé.

²¹Supak taleng tesim asare mutbín rongem, doonyi angune yagorupe asirla ngolu kaapamang;

²²Línggíngdan telo uun asir kísana angunkope bí angunpe lenla, Shédíke angun-abée ngolum pesorían dope bííbomkai.

²³Shédíke botteruna ralnam pauare yagorupe ila, ngolu bíkke anínlo aalamang. Bí agíke kénnam ségu lokla aina kebang lok tanime yébodung.

²⁴Depeila tanie bím pesorían dola kumsudung, delokke agíem gyan kanarunge emla míísuna kídíem bí kaapakdung.