Read Alladian JOB 38 Bible Online

JOB 38 - Alladian bible

JOB 38

¹Delo gumnam asar delok RUUTUM bí Jobme poyansuto:

²Ngokke kénnam gyanem, atí are kamana agomlok atí kénmape íngkína no séko?

³Ngok íngkínamem poyan sudope, tanikope dakrepla poyan sulangka.

⁴Tani amongem píduem no katonía? No kénna rungkomílo poyan sutola.

⁵Tani amongke botte-améem sékoda míílentone? Sékoda sotkyalok solla kígong kítone?

⁶Amo sokke dakkengem ingkueda tulbomdun? Tani amongke aane gaangem sékoda díílíkne?

⁷Depe idodelo rokom takar kídíe miri luto, delokke Shédíke oo kídíe ashéng lok ngomto.

⁸Amongke akii aranglok siyéng asilokke buklen rongem, sékoda tokmo kumape itumne?

⁹Ngomino siyéngem doomuglok yétgo bomtone, delokke kaamo aranglo mesiitone.

¹⁰Ngo siyéng kídí legape rísuem ibila, dekedem bitpan sumadope eyabem yapkarla idola,

¹¹“So petom biilado, delokke bitbo yimape, so kekímna silung nolu irílangka,” emla lutumne.

¹²Job nokke yénam takamlo longe atel kokom roem kaamola, longem kaamola idope lulíg kíton?

¹³Tani among so angundope lulígdola runyokna atímana amiem, longe-paanglo lenmo dokupe no polík kítonía?

¹⁴Ege ungkumnam kísa sine-moopang, delokke díítum-díírum kídíem longe angune lengkando.

¹⁵Atímana legape longe angunde asir aloodung, delokke bulum líínam agérem imomang.

¹⁶No siyéng aralokke korong kídílo makíton? demangkom siyéng lokke kutkulo gíkíton?

¹⁷Kaamona siko among lokke eyabem séko nom kaabo kíton?

¹⁸Tani among si edítko bottedun, dem no kéndunía? Ngom poyan sulangka no kéndumílo.

¹⁹Angune kolokyi lendune, demangkom kaamoe kolokyi lendune no dem kéndunía?

²⁰Buluke lenko-angkolo no gíbo layékun? Buluke bedangem no kéndunía?

²¹No dekedem kéndupe emla míído, kapeila no mijing alongkai, delokke no deddína yénamem yékai.

²²No tapam kelang tapíke lenko kumsungem kangkítonía?

²³Midu-mimak lolang ebíndí longe kídí legape, dekedem ngo irula medung.

²⁴Doonyi sangkuem no kangkítonía? Demangkom iigana sanggo asar mullenkoem no makítonía?

²⁵Sékoda pedong opeko kogongem koola, doomír-yaari bedangem mobidun?

²⁶Sékoda tani dungkímang koloteng pedong omodune?

²⁷Neyi-neyang garsa dope, sékoda pítílna amonglo pedong omodune?

²⁸Pedong elang tangare abu kadun?

²⁹Sékoda tapam kelang aapamke anepe idun?

³⁰Sékoda asiem tapampe pamkyak modun? Delokke siyéng teyongem toldope imodun?

³¹No gatbung-gattok takar kídíem yékdum sulayén? Demangkom yume puune dakkengem taalayén?

³²No moodí-moodílo takar kídíem yébo layén? Demangkom taatum-lepyo melang bíkke takar karmé kídíem, bedang sutlík layén?

³³Taleng telokke ayon-yédongem no kéndunía? No Shédíke yétaem tani among so bomalayén?

³⁴No doomug kídíem ugbomla, nome pedonglok balkyak molayén?

³⁵No yaariem tomlíkyém, yaarie nokkíng aabila, “Nokke tomlígem tayyé,” emmo layén?

³⁶Sékoda aangem kénmola, aapíem gyanlok bíísét modun?

³⁷Sékoda doomugtem sankíla, pedong odope ngenkí layén?

³⁸Sékoda demulem toldope idumsula, déngkyamem elíngpe batmo laayén?

³⁹No myomur simyoeme donam giibila, bulume aang píídope domolayén?

⁴⁰Edílo bulu bupík aralo duula, demangkom tobomla duuyém, no donam bilayén?

⁴¹Edílo pemí kídíe akii kenola, buluke ome-oo kídíe donam legape Shédí kíng ulo gogbomla iyém, no bulum donam bilayén?