Read Alladian JOB 39 Bible Online

JOB 39 - Alladian bible

JOB 39

¹Díítelo yéna siben lokke oo odíem no kéndun, delokke no sidum lokke nganga onamem kangkíton?

²Buluke ngangem edít longe kope gedun, dem no lulayén? Delokke buluke nganga odíem no pola biyén?

³Buluke pela-dola koo olen namem, buluke okii kiyin namem no kéndunía?

⁴Moonamlo buluke koo kídíe gaipe siisala, aalat sukuyimape gínyokdung.

⁵Sékoda moonamlo yéna gadoem asarpe magoomola imodun?

⁶Yépol-mooruk amongem buluke yépompe, delokke alo kako kédénglo dunggomola ine ngo.

⁷Bulu doolung kídí lokke ebín-ebon, adud-ayud kídílok mootengpe yéla, sékoteng bulum umla agér inalamang.

⁸Bulu yayina neyi-neyang donamem matala, dííte-moopanglo dogola yégo sudung.

⁹Baamíne nome agér ibiyén? Nokke guallo baamíne yoem dakbiyén?

¹⁰No baamín dem hotkya éélíktula, aal gurmo layén? Demangkom naki ilíktula moyi somo layén?

¹¹Nokke tebegna agérem ibidope, baamín delo no míída sulayénía?

¹²No baamín dem aam yikmola, dolot-kiparem pelmolayén?

¹³Ostrik[6] pettange anperung alabem taadung, idola pemí-píong kísa bulu yoplamang.

¹⁴Kédéng lokke iigange ibomdope, ostrik pettange amonglo apíem pídung.

¹⁵Tani ale tupet pelo demangkom simon-silie dopelo, emla pettangde míímang.

¹⁶Ostrige usik-tasik emla apí pírodem, bí atísin míngge kuyimang, delokke apí kídí demteng kaayi-tayyimang.

¹⁷Ngomino bíme kénnam gyanem ruulíkmape, bopolpe imone.

¹⁸Idola edílo bí duglen kadí, delo guré demla guré dugnadem, bí ngilkadungku.

¹⁹Job noa guréem raldope ruula, alíng amíde bodong-dora bítokdupe ine?

²⁰Pemír kísa bulum tíkdope, delokke mududlok amiem pesodope noa imone?

²¹Bulu eraprupe kédéngem tula, ralnamrupe mimaglo dugabomla idung.

²²Bulu pesonam kénmang, delokke gíníng-yoksekom irídmang.

²³Bulum dakbona kídíke gíníng-yokse doonyi angunlo asirdung.

²⁴Bikul muddudem tarongem, bulu asoope daglayimape dugyamdung.

²⁵Bikul murrek-murreklo bí muumín gedung. Mimak ipomlo píímang adape bulu mimak aríem ladung, delokke migom kídíke uglígem tatdung.

²⁶Pemí-mísunge nokke logía yopyilsula, bík alabem sokko danpe taalen dune?

²⁷Dííte teyolo pemíe nok agomem tatlangía asubem supdune?

²⁸Sogumde kédon yalumna líírelo asubem ila, aar kana ponyuklo bík duupomem idung.

²⁹Delokke bí elo-belo kanggoola, dopenam atoem kaatadung.

³⁰Simang teyolo sogume aadum sudung, delokke bíkke nganga kídíe iyyiem tíngkér sudung.