Read Alladian JOB 4 Bible Online

JOB 4 - Alladian bible

JOB 4

¹Teman doolung lokke Eliphajbí poto:

²Ngo agom pomílo no tatnyipe mííyédí? Idola ngo pomape ilayimang.

³No deddína amiem luyilne, ale-alag belemanem ralmone.

⁴No adung-apééna ralmana kídíem, nok agom-aange edíng motoku.

⁵Supak nokke adírdí longe píngkai, idola no deme aapí amé gedung.

⁶Nok yénamlo deemang-akang kamape, no Shédíme kumsunako.

⁷Kerang yénamlo deena amie adír paana legang, atel kokom míípang sukítola.

⁸Ngok kaaname amie atímana aal gurla, atímana amíem lelíkla ine, atímana ali-ayéem paadoku.

⁹Gumnam kísa bulum Shédíke marnamlok, nyokmo dungku.

¹⁰Atímana amie simyo myomur kísa ngírdung, idola Shédíbí buluke iipang kídíem itírla, asoope imodung.

¹¹Atí dope-tíípenam kayimana myomur simyo kísa, bulu nyokdung, delokke buluke ome-oo kídíete, yépit-yéyitla idung.

¹²Sékote kénmadope agomko pííto, Deme ngo tatsut-tallutto.

¹³Yoh immang maanying kísa de ngom ebín moto.

¹⁴Dem talla ngo pesola, dan-gela, ngok amíl tabunge tonto.

¹⁵Remelna asar kísanako, ngok migmosim itetto, delo ngok dumíde pesolok muronto.

¹⁶De atode asoope dakkai. Dem atídem dakdupe ngo kaapato, idola dekerungko emla ngo kénmato. Delo asoope ido moodí delo, adudko ngo tatpaato:

¹⁷“Shédíke keralo, sipena tanibí yéjinape ilayén? Pílen-rulennake keralo tanibí deenape ilayén?

¹⁸Teyong among lokke béérang kídíemte, Shédíbí arope míídasumang. Delokke teyong kotoki kídí loteng, Shédíbí imemem kaapa líkdumílo,

¹⁹Tabín-dorínem lajétnam kísa, ipenam demul kédénglok pínam tanimía, Shédí bí míngkesuyén?

²⁰Roh em turdope kaanam tani konete, yume píímang adape kénsumape silado.

²¹Tanide ato-siro takamem langkut kosula, kénnamem pííramla sikune.”