Read Alladian JOB 40 Bible Online

JOB 40 - Alladian bible

JOB 40

¹Job no supak Ralya yalumna Shédíme,

²tokkí-sangkí suyénía, ma luyansula yimape ila megeyénía?

³Delo Job RUUTUMme poyansuto:

⁴Ngo sanpenam kamang, ngo íngko koda nome poyan supene? Ngo atíyang potempe iyimayé.

⁵Ngo poríem pomape pobong-pokong alongto.

⁶Delo lekoda gumnam asar aralok, RUUTUMbí Jobme lupoto:

⁷Miram kísa darepla Job no, ngok íngkínamem poyan sulangka.

⁸No ngokke jonna-pénsam kebang baabinamem imemdung emla, lengkanpe idunía, demangkom no airuna kope míísula, ngom loorímana kope emdunía?

⁹No ngokke kísa ralnakua? No ngokke kísa doomír adudpe dudlayén?

¹⁰Depe míídumílo míngkím subomdola, agíem angun-abéna galugem píllíksutola.

¹¹Míngkím suna ami kídíem kanggola, nokke marnamem lengkanla bulum mínggíp sumo kítoku.

¹²Arope bulum kaala, buluk aapíem mínggíp sumola, atímana amie íngkolo yédudí, bulum momap kítoka.

¹³Bulum takamem amonglo yukíto; sinamke amonglo bulume ééla mekíto.

¹⁴Depe ilayémílo no ngom ikumto emla, kerang-nappang ngo agísue nom yidgeyé.

¹⁵No Behemoth [7] simonem kangkítola, bímkom ngo píto, delokke nomte ngo píto. Bí gooru kísa tami nagdung,

¹⁶idola íngkona ralnamko bík amíl delo kadune, delokke bíkke dínbíng kídíde edítko pauar kadune!

¹⁷Bíkke taméde sidar esing kísa kedondung, delokke bíkke ale kídíde yagorupe raldung.

¹⁸Bíkke along kídarde pitol kísape toldung, delokke bíkke ale-alagde arem ol kísadung.

¹⁹Ngokke pílennam kídí aralok reyubruname bí, pílenna ngo petom bím ikumlado.

²⁰Bíkke yéko díítum delo neyi-neyange garbidung, delokke monkír kídíe aala iman bosudung.

²¹Bí taang kana pasumlo ruusi sudung, delokke yupyang lokke dolbum aralo bí ketgodung.

²²Podum appun anne kídíe bím ugyum bidung, delokke líok kídíe bím buggo bomdung.

²³Bottena silungem bí pesomang, delokke Jordan asie bík atuk migmoem pyakkat dokom, bí dengompe igedung.

²⁴Sékoda bík migmoem ikapdola bím umlayén? Sékoda bím yéépala nyobulo naki ginlík layén?