Read Alladian JOB 41 Bible Online

JOB 41 - Alladian bible

JOB 41

¹No gakarlok Lebiathanme píklayén? Demangkom bík ayoem hotkyalok oglayén?

²No bíkke nyobung arung delo naki ginlík layén? Demangkom bíkke hokkor delo gakar koklík layén?

³Bí nom bíme gímodokupe roguyénía? Nome bím ayadope bí roguyénía?

⁴Bí nokkíng bonying ibosula, nome yénam takamlo agér ibipe emyén?

⁵No bíme pettang kísape petíl aralo tíla, mime koo kídíe iman bomdope ilayén?

⁶Esap kuuna kídíe bím tokí sulayén? Delokke pesi koret ina kídíe bíme tarope ilayén?

⁷Bíkke asig-ayoem engo níknana koonyinglok níkpétla, bíkke tukkuem gíníng lok dukulla ilayén?

⁸No leko bím uktet kítol, lekokom ukkíyimadope no mííyé. Delokke nokke bím momín sunamdem, edílokom mitpan suyimayé.

⁹Lebiathanme kaarík sukínade pesolok danla amonglo olet geyamdung.

¹⁰Bíme marmo mílo bí pesorunampe idung, dekemílo sékoda bíme dakka sulayén?

¹¹Sékoda bíme momín sudola, amíl-amoe apííyén? Taleng kuppo araso sékokom ilana kamang.

¹²Ngo bíkke amíl-amo legangem, ralnam delokke bíkke gai-gakongrupe yénamem pomape ilamang.

¹³Bíkke luyu asigem séko ségbín layén? delokke bíkke biisamruna asig kídí delok níkpét layén?

¹⁴Sékoda bíkke nappangem kingkaala, bíkke reyubruna iipang kídíem kaalayén?

¹⁵Bík lamku asigde biisam alongpe potem-polemsula, tamtepe ikolok bí míngkím sudung.

¹⁶De asig kídíde biisamrupe iríksula, asarete pénsamlok aalamang.

¹⁷Dekede yagorupe tapét bosudung, iname sékoteng ingusula pulen lamang.

¹⁸Bíkke aksik sigyém angune lendung, delokke bík amige doonyi kísa írdung.

¹⁹Bík nappanglok eme meyope lenla, mejére ponpín ilendung.

²⁰Pekinglo eme parlíkla iyém kapekísa míkkíe uusadudí, dekekísa bíkke nyobunglok míkkíe uulendung.

²¹Bíkke nganame ememe írmodung, delokke bíkke nappalok eme lendung.

²²Bík alíngde yagorupe pauar kala, kaaríksuna tabungde pesorían gedung.

²³Bíkke amíl adín kídíde yagorupe sesingla, tolla bele lamang.

²⁴Bíkke angkede aam kétkeng líítam kísa toldung.

²⁵Edílo bí gerep yédí delo miga-miram kídí eteng, pesolok akén-ayén geyimape idung.

²⁶Íngkona yoksekom bím palamang, delokke íngkona gínínge kom níklamang, delokke íngkona yokmoe kom abang lamang.

²⁷Bík legape arem deteng remyakna amkong ngotdum kísa, delokke tolna pitol deteng yana esing siipur kísadung.

²⁸Yokmolok apla bím dugge molamang, delokke bíkkíng elíng gelíknamde, ampe gyalíknam kísa idung.

²⁹Bík legape demnana singol deteng amkong kísa, delokke gíníng sutlíkyém bí ngilkadung.

³⁰Bíkke akii lokke asig-ayo kídíde, pelam-pelipe imana arem peking kísa, depeila yupyanglo gíyéme gítmíkdung.

³¹Bí eerína siyéng asiem usana asi kísape imola, delokke damalo tél nyumonam kísa imodung.

³²Bíkke gírukde asirna bedape idung, delokke asilo siputpe imodung.

³³Tani among so bím rupe supenam simon-siliyang kamang; bí atí peso emnam kénmana atoko.

³⁴Bí míngkím suyayalumna simon-sili tabungemteng; bí kaajét yindung; delokke takam moonam taro aralo bí roje.