Read Alladian JOB 42 Bible Online

JOB 42 - Alladian bible

JOB 42

¹Job bí RUUTUMme poyan sutoku:

²“RUUTUM no takamem pauar kayayalumne emla ngo kéndung, delokke nokke mííbomnamem ipíngrunako.

³Ngo atí kénma-paamape idula, nokke gyanem íngkí-bengkínamem, ngome no kape dekepe idune emla luto; ngokke atí kénmanamem, ngokke míírí-míínyope mííla míngkén manam legangem ngo pogeto.

⁴Nokke ponamem tatlangka emla no ngome pola, delokke nokke íngkí kunamem ngome poyan sulangkuka, emla ngome no luto.

⁵Kera yétonam delo ami ponam petomem tattídungai, idola supak nome ngo ngok amig sulok kaabeng sutoku.

⁶Depeila ngok ponam takam legape ngo annying sudung, delokke demul solang metbuso duudola aapíe míílat sudungku.”

⁷Jobke teyolo RUUTUMke agomem poyin rodeme, bí Eliphajme luto, “Ngo nomlang nokke angong annyi teyolo marlíngkai. Kapeila ngom agér ibina Jobke kísa ngok legangem nolu arope pomang.

⁸Depeila supak nolu rubo kíníd kolang mérbo kínídko Job kíng bomala noluke legasupe romnam aman rémoko ilangkuka. Ngome agér ibina Job bí noluke legape kumbiyé, delo ngo bík kumnamem tatbiyé, delokke talla noluke bopol ségu teyolo atímangem ilíkmayé. Kapeila ngokke agér ibina Jobke kísa ngokke aro legangem nolu pomang.”

⁹Dekepeila Eliphaj, Bildad, delokke Jophar bulu RUUTUMke pokampe ilangkula, Jobke kumnamem RUUTUMbí toríksuto.

¹⁰Jobke angong angum legape kumbirongem RUUTUMbí Jobme gai-gakongrupe mirem molangkula, bíkke kerangke miremem pemílo pakyape adukonko ruuban bilangkula utepooroem ruulíktoku.

¹¹Jobke kerangke angong-arum kídíe, delokke bíkke bírme-bíro kídare aadum sulangkula, bík ekumlo doman doboem dobo sutoku. Bík teyolo RUUTUMke itung-irénam legape bím aapíe edíng dokupe edíng-podíng langkula, bulu mipil-miyongde uun koosi asak lang aballok ayoko bomdum suyinla, Jobme amanpe biyintoku.

¹²Jobke kerang longe kídídem pemílo pakyape, bíkke yéyindí longe kídí delo utepooroem rubilangkula, mér éjar íying kolang appiko, uut simone éjar akkéko, aal gooru pumsue éjarko, delokke gadoe éjarko katoku.

¹³Bí oo kíníd kolang ome angumke abupe itoku.

¹⁴Bíkke ome abíyalum dem Jemimah, annyinana dem Kejiah, delokke aníyalum dem Happuk emla amínem mínto.

¹⁵Jobke ome kídí kísape kampone tani among so ingkolote kamato. Buluke abude, bíkke ekuserangem bulumte bíro kídarlo akampe orla panlíkto.

¹⁶Sikepe bíkke irongkuem, Jobbí dítak língko kolang takying appiko turto. Bí oten ome-oo lokke oten remé kídí emte kaapííto.

¹⁷Dekepe deddína dítagem turla yérongem bí sikaku.