Read Alladian JOB 5 Bible Online

JOB 5 - Alladian bible

JOB 5

¹“No goggong sukítola, sékote nome, adud duyyan suna kamayé. Teyong kotoki kídí aralo, séko kíngda no ngébayén?

²Aapí-aange daddat-yatyatpe mííla, agíem míngka sunamde bopol agére.

³Bopol amike edíng namem ngo kaato, idola menang asak bík ekume nyokdoku.

⁴Bík ome-oo kídíe edíloteng ipítsula yémang, delokke kebalo sékokom bulume pogulna kamang.

⁵Kenone agíke ali-ayéme dokutsudo, delokke tanyum-tatké arang lokke emte bukutdung. Tíílíne bíkke ekuserangem nedung.

⁶Atímane kédénglok garsamang, delokke ebíne amonglok sisa sumang.

⁷Kapekísa mejére emelok garsadudí, dekepe tanie agí sulo ebínem langa sudung.

⁸“Ngo nope iduamílo, ngo Shédí kíng ngokke ebínem popasuyai.

⁹Bíkke bottena agér inamem, ngolu kenpíng mínmang, delokke bíkke irisinyoem iyindí kamang.

¹⁰Bí amonglo pedong omola, aríklo asi kamodung.

¹¹Shédí bí remelna amieme gerep modung, delokke ankí-kenonem ashéng mone.

¹²Budii-bukan kana amike, aapí-aang mííbom namem, bí loorí momane;

¹³delokke agér-aname apíng madope, kénna-paana ami agér ruunamem bí etku edape isékne.

¹⁴Depeila longe raadang looteng, bulu memgo sudung.

¹⁵Idola opan aréénem Shédí bí, nyokpeko bedanglok iturdung, delokke ankí-kenonem iré momang.

¹⁶Bí opan aréénem míínam sunamem ruubidung, delokke atímanem nyokmodung.

¹⁷Shédíke iyilnam amide ashéng rune, depeila bíkke lunamem bunggeyoka.

¹⁸Shédí bí, bíkke tarí iketnamem aimokune; bíkke alage tarí moketdung, delokke bíkke alage géémo dungku.

¹⁹Nokkelok atímanem moodí-moodílo, bí mopítyé.

²⁰Dírí kenolo nom bí turmoyé, delokke midu-mimaklo nome bí turmoyé.

²¹Shédí bí nome lupu-lulumlok ipítyé, delokke nyokpekolok mopítyé.

²²Edílo tíílíng-kenoe lang díímín-momíne aayédí, deke teyolo no ngilyé, delokke monkír kídíemte no pesomayé.

²³Noluke aal gíko aríkde elíng emnam kamayé, delokke moonam lokke simon-sili eteng nom iyabom mayé.

²⁴Delo nokke tombulo aapí eetetpe no duusuyé, delokke edílo nokke mérem matayédí, no bulum dengompe yédupe paayé.

²⁵Gíídalo kapekísa deddína íínge kadudí, dekepe no deddína ome-ue kayé.

²⁶Gaddílo kapekísa aame mindudí, deke kísa mijing aroloope no turyé.

²⁷Jobe, ngolu deddína longem yékíla, kénla, sikesim podung. No torík sutoka.”