Read Alladian JOB 6 Bible Online

JOB 6 - Alladian bible

JOB 6

¹Jobbí poyansuto:

²Ngokke ankí-kenoem sér-pala lok kíkí duamílo,

³dekede siyéng lokke sulliem pemílo tebeg yayé. Iname ngok agom kídísi, tatrí-tannyo penammang.

⁴Ralya yalumna Shédíke yokmoe, ngokkíng apket líktung. deke delokke emoe amílso, bííyin bomdung. Shédíke yirí-pedíname, ngome gargo bomdung.

⁵Neyangem doyéme gadoe aiyope yédo, íímiem nakyéme goorue asoope naktado.

⁶Idola sékoda tííma-ngammana, alo kamana donamem doyén? Pílang yasinalo rokpí lokke ingko ngamnamko kayén?

⁷Dekena donamem ngo ngammang, dekede ngome kimodung.

⁸Shédí bí kapei ngokke konamem bimane? Ngokke kumnamem kapei bí tatbimane?

⁹Bí ngome peddo pagamílo!

¹⁰Dekepe iyé emla ngo kénsuduamílo, deddípe kituakom ngo ashéruyai. Shédí bí deene emla ngo kéndung, depeila bíkke lulígem, ngo edílote ipéé sukímang.

¹¹Ngo turdan tetepe íngkona ralname kadun? Ngok mííbomnam kaimarodem kape turtípene?

¹²Ngok amílsi elíngía demangkom aremía?

¹³Agíem ipítsupe ngo ralnam kamang. Séko kíng ngo igul matayén?

¹⁴Ngo Shédíme mepaklai, mepak malai, sikena dug-adírso airuna angong míídung.

¹⁵Idola pedong omayém pítílna korongpe, ngok angong kídía nolu ngome yatto.

¹⁶Korongdem tapam elang pamkége pítumto,

¹⁷idola edílo doonyie pamkie iyédí, delo korongde atí kamana pítílnape idung.

¹⁸Uut simon gíbona maglínge, asiem matagoodung, idola mapaamala yépol mooruklo sidung.

¹⁹Sheba kelang Tema lokke uut simon gíbone, mata-tatí goola idung,

²⁰idola buluke mííbomname, pítílna korong delo nyoklíkdung.

²¹Dekena korong kísape ine nolu. Nolu ngokke ankí-kenoem kaala, pesolok ngétkut sugedungku.

²²Nolu kíng ngo amankua koton, demangkom noluke miremlok, ngome repítdope emtonía?

²³Demangkom mirulok demamílo mikuplok, nolume ngom mopít langka emtonía?

²⁴Nolu ngome poyiltoi, ngokke imemem sutkantoi. Delo ngo asoope tayyé.

²⁵Jonna agomde arope míímodung, idola nolu gompoleke podung.

²⁶Nolu ngome asarem luposudung míídung; dekemílo kape nolu ejír-emarla, ngome poyan sudune?

²⁷Ane-abu kaimana ome-uem, nolu lotorí sola abílpe ine, delokke nolu angong-arum lokteng mirem nadung.

²⁸Nolu ngokke migmuem kaatola, ngo edíloteng memayé.

²⁹Noluk agom-aange yagokai, ngome luré yimapeka.

³⁰Ngokke séguem kaangíng tokula, ngo supak deena amipe idung.