Read Alladian JOB 7 Bible Online

JOB 7 - Alladian bible

JOB 7

¹Tani among so, tanie tolpe agér imanía? ríkrap yéna kísape bík longe imanía?

²Ugyumem matana abíl kísa idung, delokke longe yérem toyana, ami kísa idung.

³Poolo miyonglo ngo turbomnam kaimang, yoh mipílo ngok ankísi bojéyadung.

⁴Yume ibaalo “Edít kodí ipyéne,” emla míítídung, delokke roh angunem míítíla yoem kettídung.

⁵Ngok amílsi tapume bííla, tasude kadung, delokke tarílok sullange biilendung.

⁶Atíkoteng míínam supenam kaimape, ngok yéname idung, delokke tappínlok enno lennam kísa, ngok longe nyokdung.

⁷Ngok yénamsi ngarum atelko, ngok ashénge nyokkai. Depeila E Shédía, no ngom míípasulangka.

⁸No ngome supakmin kaadune, idola lekoda kaapayimayé. No ngom matayé, idola ngo kaimayé.

⁹Doomuge kapekísa nyokdudí, dekepe agolo aana tanie lennyinape aalat kumang.

¹⁰Bí agí ekumlo aalat suyikumang, delokke bíkke yépom-duupom ete bím kényimang.

¹¹Depeila ngo asoope duuyimayé, ngokke aidke dug-adír sime, ngo popasumape duumayé.

¹²Ngome kaabomla daggo bomdope ngo siyéng lokke bíríbít kodí?

¹³Ngok kinam sok kape imíloi emla kanggosula, ngo asoope ketge kídungai.

¹⁴Idola no maanyi-masolok, ngome peso-rían motídung, delokke aro immanglok pesomodung.

¹⁵Depeila ngo, sikena adírna, amíl so turkídumem pemílo, paksul sunamem mííyadung.

¹⁶Ngok yénamem ngo belumpe míngkai, ngom agí petomem imolangka. Yénam sim ngo apéékai, ngo deríkai.

¹⁷Tani bí nok keralo kape gairunape ikan? Kape no bík belengem kaatíkan?

¹⁸No rodípe bím kaatíla, kape minit-minitlo ikang-darkala ikan?

¹⁹No ngome takil métdí kote kadope, angukonlo migmue ila kaasumape ilamanía?

²⁰Taniem kaatína nome, ngokke paablok nome atímangko itonía? Ngo nokke legape tebegna eget kopía idun? No ngome kape apyil sukepe ikan?

²¹No ngok paabem maab lamanía? Ngok imemem no mesam lamanía? Kapeila supak ngo ago aralo dooyé, nokke matayém ngo kaimayé.