Read Alladian JOB 8 Bible Online

JOB 8 - Alladian bible

JOB 8

¹Delo Shuah among lokke Bildad poyansuto:

²“Nokke asar agomem poyin remé kanía?”

³Shédíbí edíloteng aina agérem iramla ikímang. Bí aroem ipelgoola imang.

⁴Nokke ome-ue Shédíke keralo paab imemko katope; depeila bí buluke atímangem edo radunape.

⁵Ralyayalumna Shédí kíng no aapí míílat sutolangku.

⁶No deela jonna ami komílo, Shédí bí nok ekum-erangem ipít bilangkula, nome igulyéku.

⁷Nokke nyokkana ekuserang kídíem pemílo, deme ruupeng sulayimanam amanem bí ruubiyéku.

⁸Konnyi-mennyingke dooying agomem mata kítokula, delokke buku-nekuke aro luyilem kangkí tokula.

⁹Ngoluk turnamsi andeng aloodung, deme ngolu atí kénsumang. Tani among so ngoluke yéname abír-ayo kísanako.

¹⁰Konnyi-mennyingke buku- neku kídíke, luyil-poyilem no kén-gap tokula.

¹¹Asi kamang kolo dolbume garmang, yupyang-yuyang kamang kolo, papairas esingem kaapamayé.

¹²Bulume padímang adape, buluke sisadung adapekai asi kaimamílo bulu sidungku.

¹³Shédíme kénmana ami kídíke yéname deke delokke kísa dung. Shédíke luyulo bulu míída supeko kamang.

¹⁴Buluke míngkenge enno nosol kísa, delokke moopí-tarum íam amnamlo míídasuna kísane.

¹⁵Bulu moopí-tarum íamlo bída sutokom de bulume gagbom yénía? Bulu ennolo jumda sutokom de bulum edíng moyénía?

¹⁶Atímana amie doonyi angunlo garsana mingar kísa, de aríklo buggola,

¹⁷buluke appíre elíng kídí tabunglo, gagda superung emla manggoola ine.

¹⁸Idola edílo bulum bupakdudí, delo dekede katuai emla sékote kényimayé.

¹⁹Dekepemin atímana amike ashénge idune, ami akone bíkke duupomem duubom dungku.

²⁰Idola míngkesuna amiem, Shédíbí edílokom mepakmang, delokke atímana amiem edílote igulmang.

²¹Shédíbí nome lekoda ngilmoyéku, delokke nok nabbélem ashéla ngomdokupe imoyéku.

²²Idola nom akna kídílo annyingem paamoyéku, delokke atímanake dungkeng ekum kídíem nyokmoyéku.