Read Alladian JOB 9 Bible Online

JOB 9 - Alladian bible

JOB 9

¹Job bí poyansuto:

²“Aroe, ngo tabungdem kerapekai tatyinto. Idola séko amieda Shédíme kebang lukumna kadun?”

³Sékoda bíme lukí sulayén? Sékoteng poyansula manam íínamem bí éjarkope ííladung.

⁴Shédí bí yagorupe kénne, delokke bí botterupe ralnam kane, íngkona amiekom bím ikísulamang.

⁵Atí lurung-porung mape bí díítem ine-hiola bíkke markolok nyokmone.

⁶Bí amongem beleng mola taron tonmone, delokke tani amongke duuda sukengem epínmone.

⁷Bí doonyi sanamem itumlane, delokke takarem angun kamadope ilane.

⁸Bímin taleng kuppoem pílenne, delokke siyéng lokke silungem eetetmone.

⁹Bímin yume puunem, delokke gatbung-gattok kídíem lang, dígín-díyu rísuem pílenne.

¹⁰Bí sapla yimanam míípí yimanam, irisinyo takamem ine.

¹¹Bí ngom gíbong dokom ngo bím kaapamang, delokke ukpaamang.

¹²Bí bík míínamem laane, delokke sékote bím lutum lamang. Sékoteng bíme, “No kape idun?” emla íngkílana ami kamang.

¹³Shédíke marnamem itumlana kamang. Bíríbít bottena Rahabme [5] igulna kídíemte, bíkke ale rumkílo bí tujémne.

¹⁴Depeila Shédíme kapekísa ngo poyansuyén, delokke akmín suyén?

¹⁵Ngokkíng atí dug-simo kamangakom, ngome kebang lubina Shédíke ayang emmin ngo matala duune.

¹⁶Bí ngom agom pomo dagakom, bí ngok agomem tatbimayé.

¹⁷Atí kamape gumnamem melíkla, ngom pakyape kinamem kimo lado.

¹⁸Bí ngom lekoda ngamo kumang, delokke ayanpe ankí-kenoem bojéya modung.

¹⁹Bím ngo uglík layénía? Sékoda Shédíme ugla luladun? Bím ngo kebang baabom layénía? Demangkom bím gídope ila líkyénía?

²⁰Ngo míngke sudungai delokke atí kénmanako, idola ngokke nappa sogei luka sudung, delokke ngok agom-aang ponam tabude ngome lusu kunape idung.

²¹Ngo atí kénmanako, ngok agí legape atí míísumang, ngok yénam sim ngo belum sudung.

²²Ai lai atí malai, de atí kamang, ainem lang aimanem bí nyokmodung.

²³Atí kénmana amie menang asak sinamko kamílo, Shédí bí ngilkadung.

²⁴Atímana amilo tani gíídang sime, Shédí bí bilíktung. Bí kebang ruutum kídíemte mikmang moyintung; dekepe bí imamílo sékoda itun?

²⁵Ngokke yénam longe si dugdugnem pemílo menayape idung. Idola lootel kokom ashéng kamang.

²⁶Piri-pogoem joodope kapekísa pemíe menape yoptokdudí, asi ralkolo kapekísa etkunge yuddug dudí, deke kísa ngok yénam siteng idung.

²⁷Ngokke kinamem míínyoksupe emla ngo ngilkí lateng, menarupe mííruk demdada mínga dungku.

²⁸Ngo dem kénsudung, Shédí bí ngom aimang emla míídan tetedung.

²⁹Ngome atímana kope míírodem, kape ngo aang kití geyén?

³⁰Atí-atí sabonlok ngo molsu dokom, ngok paabem molbín suyimang.

³¹Shédí bí ngom kobung namsilo ellíkto, depeila ngok ege-kídíekom ngome belumdung.

³²Shédí bí tani kuamílo bím ngo lumín suyai, delokke kebang baabosula orekko luyai.

³³Idola Shédí kela ngokke pénsamlo, sékote aala kebang lubina delokke lula bina kamang.

³⁴Bíkke reyubname ngokkíng kaimadope, sékoi bík keralok ngome isék yéne.

³⁵Delo ngo pesomape legangem pokanyé. kapeila ngokke agí aapíem ngo kénsudung.