Read Alladian MIRILUNGGU 103 Bible Online

MIRILUNGGU 103 - Alladian bible

MIRILUNGGU 103

¹Ngokke aida, RUUTUM bím yidgelangka; ngokke turnana takame bíkke deena amínem yidlangka!

²RUUTUM bím yidlangka ngokke aida, delokke bíkke deddíko ayanamem mitpan sumapeka.

³Bí ngokke paab takamem mesam bidung, delokke ngokke kinam takamem ipídung.

⁴Bí ngom agolokke motur dungku, delokke ngom ayang lolang yaasamlo gérmodung.

⁵Ngo pemí kísape ralla yaamépe duudope, bí ngok yénamlo aina atíem bidung.

⁶RUUTUM bí iréénam kídíem kaayin tatyinpala, buluke paape namem bidung.

⁷Bí bíkke míínamem Mosime lengkan bito, delokke Israel amikídíem bíkke ralnam agérem kaamoto.

⁸RUUTUM bí yaasamla ayanako, martu manako delokke ooyimana ayangem bomgapnako.

⁹Bí agínpe géétímang, bíkke marlíngemte bí bomtímang.

¹⁰Ngoluke paab ikorlok bí ngolum ingéémang, demangkom ngoluke paab imem samemem edo rakumang.

¹¹Talenge amosokke edítko kedondudí, dekepe ooyimana ayangde bím mínggena kídílo edíírupe duudung;

¹²sanggode edítko anggolokke moote dudí, dekepe bí ngoluke paabem mootepe langgé bidung.

¹³Abue agíke ome-uem ayanam akampe, RUUTUM bíkom bím mínggenem ayadung.

¹⁴Ngolum ingkolok pítodí dem bí kéndung; ngolu kédenge dem bí kéndung.

¹⁵Ngolukepe ngoluke yénamde ííng kísadung; ngolu siisala appun kísape pundung;

¹⁶delo asare yapyém de dílpakdo, delo sékote dem kaapang yikumang.

¹⁷Idakkom RUUTUM bím mínggena kídílo, bíkke ayange agínpe duuyardung, delokke bíkke ainame siirum siirum loope duuyardung.

¹⁸Delokke bíkke daapongem bomgapna, delokke bíkke ngiitomem míípasuna kídílokom depe idung.

¹⁹RUUTUM bí teyong telo bíkke palengem metung; bí takamlokke Roje.

²⁰RUUTUM bím koyit langka, bíkke agomem tatna igena tolna ralna teyong yaamé kídía!

²¹Teyong ralnamem gela, bím igulna bíkke míínampe ina kídía, RUUTUM bím koyitlangka.

²²Bíkke pílen rulennam, yébom dakbomnam asi among kídía, RUUTUM bím rínggelangka. E ngokke aide, RUUTUM bím koyitlangka.