Read Alladian MIRILUNGGU 104 Bible Online

MIRILUNGGU 104 - Alladian bible

MIRILUNGGU 104

¹RUUTUM bím koyitlangka, E ngokke aida! E RUUTUM, ngokke Shédíe, no edítko bottenakon! No angun loklang miga miramlok ege genako;

²no angunem ege galukpe gedung, no teyong amongem tombupe pokab bomdung,

³delokke no agí ekumem asi teyolo modung. No doomugem agí guré gaari kísape idung, delokke asarlokke alaplo duudung.

⁴No asarem kotokipe medung, delokke yaariem agí béérape idung.

⁵No amongem edíírupe píto, sim edílote ngenlayimang.

⁶No aane siyéngem among teyoso ege kísape tamlíkto, delokke asiem díítelote eemoto.

⁷No asiem luyém, bulu dukgedung; nokke tolnampe lulíkyém bulu duknyok gedung.

⁸Díítelok biilangala yiibe loope korongem roolíkla no biimoto.

⁹Amosim asiem eelat langkula biilup yimadope no rísuem píbitung.

¹⁰Korolo sirunge olíkdope, de dííte borbulok tokdope no píto.

¹¹Bulu amosokke simon sili takamem asiem bidung. Deloge sisuk kídare tíílíngem tíísik sudung.

¹²Robelo duuna esing kídílo pettang kídíe asup suptula miri ludung.

¹³No talenglok pedongem omodung, delo tani amonge jédung.

¹⁴No simon sili dopenampe ííngem saamotung, delokke tanie arík ila dodope neyi neyangem lenmotung,

¹⁵tani aapíem ashédope onggur apongem, bíkke mingmue angundope télem, delokke raldope dotkéem bitung.

¹⁶RUUTUMke mosaanam Lebanon lokke sidar esingemte pedong asiem bitung.

¹⁷Bulukíng pettange asup supkedo, Bogoli pettange pir esinglo dungkedo.

¹⁸Kedonna dííte kídarde sibí dungkenge; líírude ketí-kejak dungkue.

¹⁹No pooloem toodí yamo kaangkepe pítung; doonyie uadíem kénsudope itung.

²⁰No kaamolok yuem pítung, delo simon sili takame malendo.

²¹Myomur oo kídíe ngírla Shédíke binam dotkéem matadung.

²²Doonyie saayém bulu enlangkula agí asuplo keddoku.

²³Tanie agíe agí agérlo gído, delokke ademangem itíla yédo.

²⁴E RUUTUM, no deddína atíem pílentung! Dem takamdem no kénpi perila pílentung! Tani amosi nokke pílennam turna atíe bíísétdung.

²⁵Delo bottena bortakna siyénge kadung, delo sanam yimanam bottena aména turna atíe bojéko kadung.

²⁶Jajie delok teyolo yutdung, delokke nokke pínam siyénglok Bíríbít simone soomandung.

²⁷Si takam si buluke dolíyém nokke donam binamlo míída sudung.

²⁸No bulum biyém, bulu dem dodo; nokke dotké binamem dola bulu kiidardo.

²⁹Nokke mingmue ngéésik suyém bulu míímésudo; buluke nganamem laabínyém, bulu sido, delokke kédélo aadoku.

³⁰No nganamem melíkyékuem, bulu turdoku; delokke no amoso anípe turnamem bidoku.

³¹RUUTUMke angun ralname duuyar langka, RUUTUM bí agíke pínam atí kídíem ashépe míísu daklangka!

³²Bí amosim kaasuyém amonge dan-gedo; bí díítem ukkíyém, de míkkípe uulendo.

³³Ngokke dungkídu tetengem, ngo RUUTUM me miri lubiyé; ngokke duudu tetengem ngokke Shédíme miripe rínggeyé.

³⁴Ngokke kumnamem bí mííyum sudaklangka, kapeila ngo RUUTUM bíkkíng ashédung.

³⁵Paab gena kídíem tani amosokke nyokmo daklangka, delokke atímana kídíe, kaimadak langka! E ngokke aide RUUTUM me ríngge langka! RUUTUM me yidlangka!