Read Alladian MIRILUNGGU 106 Bible Online

MIRILUNGGU 106 - Alladian bible

MIRILUNGGU 106

¹RUUTUM bím ríngge langka. E RUUTUM bím yidgelangka, kapeila bí aine; legade bíkke ooyimana ayade agínpe turyarne!

²RUUTUMke bottena agér inamem séko pobiladun? Séko apíí píílí bím koyit layén?

³Séko bulu bíkke jonnam agérem igedudí, séko yéjinam agérem agínpe iyardudí bulu gérne.

⁴E RUUTUM, nokke amikídíem igulduem ngomte míípang sulangka; bulum melen yékuem ngomte itak sutoyika.

⁵Nokke ullennam kídílokke jénam remnamem ngomte kaamoyika, delo ngo nokke opínlokke ashéngkolo ashémínyé, nokkelo bottepe míísuna kídílo bottemínyé.

⁶Ngolulang delokke ngoluke abukídíe paab ito; ngolu imemto delokke atírumape ito.

⁷Ijipt amolo duudungem, ngoluke abu buku kídíe, nokke irisinyo iyodem aro míímape ito; nokke ooyimana ayangem bulu míípang sukumang, dem megeyéla Silíng Siyénglo Ralya yalumna bím akpésuto.

⁸Idakkom bí bíkke pébisukorlok, bíkke tolna ralna agérem lengkannape bí bulum laasitoku.

⁹Bí Silíng Siyéngem oolangka emyéname de ongkai, delo bí ami kídídem pítílko raadalok koobotoku.

¹⁰Dekepe bí bulum nenakídí lokkete laasitoku, delokke mibo miru lokkete bulum melentoku.

¹¹Delo asie buluke miruem eelumto; atelkote turmomape siyinmoto.

¹²Delokrongem amikídíe bíkke pébisunam agomem arope mííto; mííla bím koyitnam miriem rínggeto.

¹³Idakkom bulu menang asak bíkke agérem mitpan sutoku; bíkke luyilem toyamape mínggípe isuto.

¹⁴Bulu mooruk amodelo dotí tíítíto, delokke Shédíme darkaato;

¹⁵dekepe iname bí bulum buluke konamem bito, idola buluke gooralo pesorunam kiliiem melíkto.

¹⁶Mooruk amodelo RUUTUMke deena béérang Mosi melang Aaronme negooto.

¹⁷Delo amonge barkéla Dothanme métto, delokke Abiram melang bíkke erang kídarem amonge bénlumto.

¹⁸Bulukíng yémín gena kídílo eme oletla atímana amikídíem gupakto.

¹⁹Bulu uunlok gooru mimangko Sinailo píla dem kumsuto.

²⁰Shédíke angun ralnamem bulu tami dona gooru mimangkolo inato.

²¹Ijiptlo bottena atí-siríem ibina, bulum mopítkuna buluke Shédíme bulu menyoksuto,

²²Deddína irisinyuem bí delo ibito! Delokke kangkí rumanam atíem Silíng Siyénglo lengkanbito.

²³Shédí bí bíkke amikídíem petpakyé emduem, bíkke ullennam béérang Mosi bí buluk legape Shédíkíng daggebito, delokke bíkke marlíngem remak molangkula bulum petmomato.

²⁴Delokrongem bulu yépona amongem mepaksuto, kapeila bulu Shédíke pébisunam agomem aro míímato.

²⁵Bulu agí notkolo lugebosula duuto, delokke RUUTUMke agomem tatbi yimang.

²⁶Delok legange bí bulukíng pésula luto, bí bulum mooruk amolo simoyé.

²⁷Bí buluke ome-uem mipak kídí amolo monpansula, bulum mibo amolo simoto.

²⁸Delokrongem Peorlo Shédíke amikídíe Baalme kumsukolo kumsumínto, delokke turmana shédílo palíknam sobuem dobosuto.

²⁹Buluke agérlok RUUTUM me iakto, delo bulukíng yirínam kiliie angkai.

³⁰Delokrongem Phinehas bí gerepla imemnem ingééto, delo kiliie kiyimang.

³¹Meribah sirunglo amikídíe RUUTUM me marmoto,

³²delo Mosi bí buluke legalok adírem paato.

³³Bulu bíkke aapíem aklínge imokolok bí bulum luki kirola luto.

³⁴RUUTUMke pokampe, bulu mipak amikídíem petmang,

³⁵idakkom bulu mipak kídílo nyameng laabosula buluke yékampe yémín geto.

³⁶Shédíke amikídíe mimang kumsuto, de buluke nyoknane.

³⁷Bulu Kanaan uromlo agíke ome-oo kídíem sobope pabisuto;

³⁸bulu atí kénsumana agíke ome-oo kídíke iyyiem mimanglo petbisula yilíng biimoto, depe ila amongem ibít sikatto.

³⁹Bulu agí agísue agí agérlok deemangem iketsuto, dekepe ila Shédíkíng míngkesumato.

⁴⁰Dekepe ila RUUTUM bí bíkke amikídíem marbomto, bí bulum aro mííyimang.

⁴¹Buluke kangkinam amie, bulum yébom yépe emla bí bulum mipak gooralo melíkto.

⁴²Bulum miru kídíe irééto, delokke buluke rumkíng beroklo duuto.

⁴³Deddíko bí bulum mopíttuai, ilate bulu bím ipéé pétísula paab suyunglo yulum yayang ito.

⁴⁴Depe ilate buluke kapyém RUUTUM bí buluke adírnamem kénbito.

⁴⁵Buluke legape bí bíkke daapongem míípasutoku. delokke bíkke bottena ayanglok bí aklíngem ngayisuto.

⁴⁶Bulum irééna kídíem bí buluke teyolo ayang míípang sumotoku.

⁴⁷Ngolu nokke deena amínem koyiddope, delokke rínggedope E RUUTUM, ngoluke Shédíe, ngolum angu opín gooralokke laadum sutokuika.

⁴⁸RUUTUM, Israelke Shédíme ríngge langka; bím agínpe ríngge ayar daklangka. Delo mipile lulangka, “Amen!” RUUTUM me ríngge langka.