Read Alladian MIRILUNGGU 107 Bible Online

MIRILUNGGU 107 - Alladian bible

MIRILUNGGU 107

¹E RUUTUM bím koyit langka kapeila bí aine; legade bíkke ooyimana ayangde duuyarne!

²Bíkke laasing kunam takam nolu sim agom kídarsim RUUTUM bím rínggelangka. Bí nolum miru lokke laasing toku,

³delokke anggo sanggolok, delokke línggíng sokkolok mibo amolokke nolum laadum sutungku.

⁴Ayokone bedang looríyimang, mooruk apyamlo doolung duupeko mapa yimape matíto.

⁵Bulu tíílíng kenue ila míípét peko bedang kaimape ito.

⁶Delo bulu RUUTUM kíng buluke adírem kapgusuto, delo bí bulum ankí-keno lokke mosiito;

⁷bí jonnampe buluke duupeko doolunglo píílíkna bedalok bulum gíboto.

⁸Bulu RUUTUM me bíkke duuyarna ayang legapelang, bulukepe bíkke irisinyo atíem ibinam legape koyitrupe aido.

⁹Tíílína kídíem bí tíísik sumodung, delokke kenonem aina atílok kiidar modung.

¹⁰Ayokone kaamo ruage ikolo duudung, pateklo duuna kídíe ikoliem getíla adírdung,

¹¹kapeila bulu Shédíke agomem ipéésuto, delokke tolna yalum Shédíke ngiitomem takil sukkatto.

¹²Bulu deddípe agér ikolok idírsula, molayimape doodungkom sékote igultope emla míína kayimang.

¹³Delokrongem bulu RUUTUM kíng buluke adír asongem kapgusuto, delo bí bulum buluke aréélokke mopítoku.

¹⁴Bí bulum kaamo ruaklokke laalentoku, delokke buluke ikoli genamem kínpakbito.

¹⁵Bulu RUUTUM me ooyimana ayang legape, bíkke bulukepe irisinyo atí ibinam legape berokpe koyitpe aido.

¹⁶Bí yokdínlok inam eyabem kiipendung, delokke arem íkkarem tírsékdung.

¹⁷Ayokone buluke paab ikorlok kito, delokke buluke paab adonglok adírem paato;

¹⁸Bulu donam dolí yimala sita simang ito.

¹⁹Delo buluke adírem molayimala bulu RUUTUM kíng kabbisuto, delo bí bulum adír lokke mosiitoku.

²⁰Bí agí agomem melíkla bulum ipítoku, delokke nyokpe kolokke bulum mopítoku,

²¹RUUTUMke ooyimana ayang legapelang, bíkke bulukepe irisinyo ibinam atí legape, bulu bím yidgerupe aido.

²²Bulu bím sobo pabila ashéng miriem lula bíkke inam sanam takamem pokanpe aido.

²³Ayokone jajilok siyénglo yudgola pesi koret igoto.

²⁴RUUTUMke asi teyolo inam agérem, aane teyolo bíkke irisinyuem bulu kaato.

²⁵Bíkke lulíklok gumnam asare mutto, delokke sipyar situme telokkai ito.

²⁶Asi jajie telokkai pungonpala rumkí belokai omap langkula ito, amikídíe roonge píd píd ito.

²⁷Bulu tíngírsuna kísape tube tubresula yénggo yénggosula ito, buluke etkung yutjinamde atí kaboyimang.

²⁸Delokrongem bulu sulayimala RUUTUM me kabbisuto, delo bí bulum adírlokke mopítoku.

²⁹Bí gumnam asarem gummoyimato, delokke sibung situmem remelmoto.

³⁰Asare, situme aikukolok bulu ashétoku, delokke bí bulum buluke lenkupeko pígolo lenbotoku.

³¹Bulu bíkke duuyarna ayang legape RUUTUM me koyitrupe aido, kapeila bí bulukepe irisinyo atíem ibito.

³²Bíkke bottenamem bulu baane gooralo pogerupe aido, delokke miro kídíke gooralo bím rínggerupe aido.

³³RUUTUM bí asi korongem oopí pítílmoto, delokke sirungem lenmoyimape ito.

³⁴Delo duuna amikídíe atímape ikolok, bí moone kédéngem soyit amope itoku.

³⁵Bí mooruk amongem paatang asipe ito, delokke erengko amongem sirung tokmoto.

³⁶Bí kenona ami kídíem delo duudope ito, delokke delo bulu doolungpe dungkai.

³⁷Bulu arík pala ali ayémlang onggur anem lelíkto, lelíkla alum yimanam aliem yittoku.

³⁸Bí bíkke ami kídíem lubéélíkto, delo buluke ome-ue bojékai, delokke buluke gooru sobénem nyokmomato.

³⁹Edílo Shédíke amiem ikumla itung siréé kotírlok annying moyédí,

⁴⁰bí irééna kídíem kangkidung, delokke bulum bedang kamangko mooruk amolo magoo modung.

⁴¹Idakkom bí pííram sémona kídíem, ankí kenolokke mopítoku. Delokke bulum sobén gooru kísape parmodung.

⁴²Deenampe yéne sim kaala ashédung, idakkom mirul amikídíem agom pomoyimang.

⁴³Ami aro kídíe sim atí kídí sim míngkípe aido; bulu RUUTUMke duuyarna ayangem ankén daklangka.