Read Alladian MIRILUNGGU 118 Bible Online

MIRILUNGGU 118 - Alladian bible

MIRILUNGGU 118

¹RUUTUM me koyitlangka, kapeila bí ainako, delokke bíkke ayangde duuyarne.

²Israel amikídíe lulangka, “Bíkke ayangde duuyarne.”

³Shédíke mirikídíe lulangka, “Bíkke ayangde duuyarne.”

⁴Bím kumsuna takame lulangka, “Bíkke ayangde duuyarne.”

⁵Ngokke adírduem ngo RUUTUM me gokto; bí ngom poyansuto, delokke asarpe melentoku.

⁶RUUTUM bí ngokkíng dung, ngo pesomayé; séko ngom ingko atíko ilayéne?

⁷RUUTUM bímin ngom igulnade, delokke mirukídíem ikumdope ngo kaayé.

⁸Taniem míída supemílo RUUTUM kíng míída sunamde aiyado.

⁹Tanike ruutumlo míída supemílo RUUTUM bíkkíng duusi genamde aiyado.

¹⁰Deddína mirue ngom gargooto, idakkom ngo bulum RUUTUMke ralnamlok ikumto.

¹¹Bulu rego mipílok ngom gargooto, idakkom ngo RUUTUMke ralnamlok bulum ikumto.

¹²Bulu ngom tangut kísape yinggoto, tang teeruem eme gunam kísape rígooto, idakkom RUUTUMke ralnamlok bulum ngo ikumto.

¹³Ngo pesola oletdope ngom nyorgooto, idola RUUTUM ngom igulto.

¹⁴RUUTUM bí tolmodung, delokke ralmodung, bí ngom ituryé.

¹⁵Shédíke amikídí lokke notkolo ikumnam gogying em tattola, “RUUTUMke tolnam-ralnam lok dem itung!

¹⁶Bíkke ralname ngolum ikumnamem bitung, bíkke tolname mimaklo dekepe ibotung!”

¹⁷Ngo simayé idola ngo turyé, delokke RUUTUMke agérem gogying geyé.

¹⁸RUUTUM bí ngom ingééto, idola bí ngom simomang.

¹⁹Kumkeng Ekum eyabem ngom siyyabika, ngo aralo aala RUUTUM me yidgeyé!

²⁰Simoko RUUTUMke luyabe; aang gejiina petome delo aaladung.

²¹RUUTUM nom ngo rínggedung, kapeila no ngom tatbito, legade no ngom ikumnamem bito.

²²Ekum mona kídíke are kamana mepaknam líídude gai yalumnape ikaku.

²³Sim RUUTUM min depe itune, si kaaperunam irisinyo atíko.

²⁴Si RUUTUMke ikumdí longe; ngolu kéémíng ilaju!

²⁵E RUUTUM, ngolu rogudung, ngolum mopít toika ngolum ikumnamem bika.

²⁶RUUTUMke amínlok aanadem Shédí bí lubéé daklangka! RUUTUMke Kumkeng Ekumlok nolum ngolu lubéélíkdung.

²⁷RUUTUM bímin Shédí bí; bí ngolum ainamem bito. alaglo gíídí nemíngem bomdola, deena rungguem yon goolangka.

²⁸Nomin ngokke Shédíe, delokke ngo nom yidgedung; nomin ngokke Shédíe, delokke ngo nokke bottena amínem pogeyé.

²⁹E RUUTUM me koyitlangka, kapeila bí ainako; delokke bík ayangde turyarne!