Read Alladian MIRILUNGGU 119 Bible Online

MIRILUNGGU 119 - Alladian bible

MIRILUNGGU 119

¹Séko buluke yéname imem kamadí, delokke séko bulu RUUTUMke ngiitomlok yédudí bulu gérne!

²Bíkke lulígem tatla, bím aapí aang tabung lok belenggena kídíde gérne.

³Bulu edílokom imem kamang, bulu RUUTUMke bedalok gídung.

⁴RUUTUM, no ngolum nokke ngiitomem tomdung, delokke dem mínggapla igedope ngolum pobito.

⁵Nokke ngiitom kídarem edítko ngo bomgap domílo emla míídun!

⁶Ngo nokke ngiitom takamem mínggap mílo ngom annying momayé.

⁷Nokke aina bisarem ngo kénmílo, nom ngokke deenam aapílok rínggeyé.

⁸Ngo nokke ngiitomem tatyé, ngom edílokom mepak mayika!

⁹Kape kísa yaamé kooe agíke yénamem deenampe mekandon? Nokke agomem tatmílomin.

¹⁰Ngokke aapí aang tabunglok nom ngo matadung; nokke ngiitom lokke ngom gípak mokumayika!

¹¹Nom ipéésumadope emla nokke ngiitomem ngokke aangso ngo bomgapdung.

¹²E RUUTUM, ngo nom rínggedung, nokke bedangem ngom luyiltoika.

¹³Nokke binam ayon ngiitom takamem ngo bottepe rítígeyé.

¹⁴Ngo mirempe ipenamem pemílo nokke ngiitomem mamín genamem aiyape míídung.

¹⁵Ngo nokke luyilem poridung, nokke luyilem ngo kangkí tatkídung.

¹⁶Nokke ayon ngiitomem ngo aipe míídung, nokke lulígem ngo mitpan sumayé.

¹⁷Nokke béérang ngom, no ailangka delo ngo turla nokke luyilem igeyé.

¹⁸Nokke ayon ngiitomlok irisinyo aroem kaadope ngokke amigem migdarmoika.

¹⁹Tani amoso ngo duupoope nakomin, nokke ngiitomem ngokke lokke mesup mayika!

²⁰Ngokke aapísi míítíla aange kiname idung, nokke bisarem ngo kénpe emla mííbom ayardung.

²¹Adum-ale inakídíem no lungéédung, nokke ayon ngiitomem igemana kídíde gérmang daklangka.

²²Buluke luka luyé lokke ngom apít motoka, kapeila ngo nokke ayon ngiitomem igedung.

²³Ruutum bomna kídíe ríksula ngom míírí míínyo bomdakkom, ngo nokke béérasi nokke poyilem poriyé.

²⁴Nokke lugap binam ngiitomde ngom erap modung, dekede ngom pogulne.

²⁵Ngo amolo molayimape dong, nokke agomlok ngom turmokuika.

²⁶Ngokke imem takamem pokan suduem no ngom tatbito; ngokke bedangem poyilto.

²⁷Nokke ayonem ngom kénmoika, delo nokke gairuna luyilem ngo míítíbomyé.

²⁸Ankí-kenue ngom ikum bomdung, nokke agomlok ngom ralmokuika.

²⁹Gímempeko bedalok ngom melíkmayika, delokke ayasula ngom nokke ngiitomem luyiltoika.

³⁰Ngokke míngkesuko bedangem totobong, ngo nokke bisarem an-gapbomdung.

³¹Ngo nokke pogap sérap namem matadung E RUUTUM, ngom annying momayika.

³²Ngo nokke ngiitomlok gíyé, kapeila no ngom kénsunamem biyé.

³³RUUTUM nokke ngiitom gítíngem luyiltoyika; delokke ngo dem yéyin loope bomgapyé.

³⁴Nokke ngiitom ayonem ngom pobeng bitoika, delo ngo dem igeyé; ngo dem ngokke aapí aang tabunglok bomgapyé.

³⁵Nokke ngiitom bedalok ngom gíboyika, kapeila ngo delo ashépe míídung.

³⁶Paape dopenamem pemílo nokke ngiitomem igelídope aapíem bika.

³⁷Ngom are kamana atílo erbom momayika, nokke pébisukampe ngom nokke lekorlok gídope turnamem bika.

³⁸Nom pesogena kídíkepe nokke pébisunamem nokke bééranglo, melíklangka.

³⁹Ngokke pesope míínam luka luyélokke ngom mosiitoika; nokke bisarde edítko aidun!

⁴⁰Ngo nokke ngiitomem igelídung; ngom anípe turkunamem bika, kapeila no deenampe yéne.

⁴¹Edítko no ngom ayadudí, ngom lengkantoika E RUUTUM, delokke nokke pébisukorlok ngom mopíttoika.

⁴²Delo ngo ngom lupu luyénem poyansuyé, kapeila nokke agomlo ngo míídasudung.

⁴³Ngom aroem poyan sumolangka, kapeila ngokke míída sunamsi nokkelo dung.

⁴⁴Ngo nokke yédongem yénam daknamlo agínpe bomyaryé.

⁴⁵Ngo yéten sumangko arolo yéyé, kapeila nokke luyilem ngo igedope ralbomdung.

⁴⁶Rojakídílo, nokke ngiitomem ngo pokanboyé, delo ngo annyingmayé.

⁴⁷Ngokke airupe míínam, nokke ngiitomem ngo igelípe míídung.

⁴⁸Ngo nokke ngiitomem mínggela ayadung, ngo nokke pogap sérapnamem míngííyé.

⁴⁹Nokke béérang ngom nokke pébisunamem míípang sulangkuka; si ngom míínam sumodung.

⁵⁰Ngokke adír duemte ngo míípope míísudung, kapeila nokke pébisunamde ngom turnamem bidung.

⁵¹Shédí kénmana kídíe ngom agínpe lungildung, idakkom ngo nokke ngiitom lokke gípek sumang.

⁵²Nokke kerangokake bisarem ngo míípang sudungku, delokke de ngom míípope míímodungku, E RUUTUM.

⁵³Mirul amikídíe nokke ayon ngiitomem beddope kaayém, ngo marlírunge idung.

⁵⁴Tani amoso ngokke anyongko yékídungem ngo nokke polígem miripe attung.

⁵⁵Nokke amínem yohlo ngo míípasudung E RUUTUM, delokke ngo nok ayonem mííbomdung.

⁵⁶Nokke lulígem igekolo ngo ashéngem paadung.

⁵⁷RUUTUM, nomin ngokke mííbomruname, ngo nokke ayonem bomgapyé emla pébisudung.

⁵⁸Nokke pébisukampe ngokke teyolo yaasamdope, ngo ngokke aapí ainang tabulok kodung.

⁵⁹Ngo ngokke akorem kénsula nokke polígem ipe emla pésudung.

⁶⁰Dengemape menape nokke polígem igepe emla míídung.

⁶¹Mirul amie ngom agotlo batpe emla tobomdung, idakkom nokke ayon ngiitomem mepaksumang.

⁶²Nokke deena bisarem rínggepe emla ngo yoh raajang emte gerepdungku.

⁶³Nom kumna takamlokke, nokke ayon ngiitomem igena takamlokke angongko ngo.

⁶⁴RUUTUM, amosi nokke duuyarna ayange bíísétdung; nokke ngiitom kídíem ngom poyiltoika.

⁶⁵Nokke agomem no bomgapto RUUTUM, delokke no nokke béérangem aibosudung.

⁶⁶Aina bisaremlang kénnamem ngom bitoika, kapeila nokke ngiitomem ngo arope míídung.

⁶⁷Nokke ngom ingéé mangadape ngo imem memtídungai, idola supak ngo nokke agomem taddung.

⁶⁸No aine delokke ayane; nokke ngiitomem ngom poyiltoika.

⁶⁹Adum alena amie ngokke teyolo metí goodung, idakkom ngokke aapí-aang tabung lok nokke lugap namem ngo igedung.

⁷⁰Si amikídí si ankén kangkén sumang, idola ngodan nokke ayon ngiitomem ashépe míídung.

⁷¹Ngom ingéénamde ngokke ainam legape itung, kapeila de nokke ngiitomem kénmodung.

⁷²Tani amosokke murkong poisar empemílo nokke ayon binamde aiyane.

⁷³No ngom pílento delokke mopítto; nokke ayon ngiitomem kéndope ngom tatkén nana aapíem bika.

⁷⁴Nom pesogena kídíe ngom kaala ashéyé, kapeila ngo nokke pébisunamem míínam sudung.

⁷⁵Ngo kéndung E RUUTUM, nokke bisarde deene, delokke nokke míngkeng akorlok ngom no ingééto.

⁷⁶Nokke béérang ngom pébisukorlok, nokke duuyarna ayanglok ngom míípo moika.

⁷⁷Ngom ayatoika delo ngo turyé, kapeila nokke ayon ngiitomem ngo ashébomdung.

⁷⁸Ngom menamlok ajéng luket líknem mogíp tokuika, ngodan nokke luyilem míítíbomyé.

⁷⁹Nom mínggena kídíemlang, nokke ngiitomem kénna kídíem ngokkíng aamolangka.

⁸⁰Ngom nokke ngiitomem apíípe imolangka, delokke lupe gépenam kamomayika.

⁸¹Ngo bengal alongkai RUUTUM, ngom mopítdokupe nom ngo toyadung; nokke agomlo ngo míídasula dung.

⁸²Nokke pébisunamem kayangkolo amige adír kabong. Ngo kodola poto, “No edílo ngom igulyéne?”

⁸³Ngo mepaknam apong giri ayo kísa, depe ilate nokke ngiitomem ngo mepakmang.

⁸⁴Ngo edítko toyapene? ngom irééna kídíem no edílo ingééyéne?

⁸⁵Míngkímsula nokke ayonem igemana bulu ngom obusuyépe emla arung koodung.

⁸⁶Nokke ngiitom takamde míída subaname, amikídíe ngom menamlok iréédung, ngom igultoika.

⁸⁷Bulu ngom petdak bongai, idakkom nokke ngiitomem ngo mepaksumang.

⁸⁸Nokke ayon ngiitomem ngo igepe, ngokke turnamem nokke duuyarna ayalok mosiitoika.

⁸⁹Nokke agomde, E RUUTUM duuyaryé; de teyong telo duuyarne.

⁹⁰Nokke arode siirum siirum loope duuyarne; no amosim mepekolo meto, delokke de supakkom dung.

⁹¹Atí takame supak loope nokke lulíklok deperung dung, kapeila de takam nokke béérange.

⁹²Nokke ayon ngiitomde ngokke ashéng leríípe imangamílo, ngo ngokke adírlok siyai.

⁹³Ngo nokke lulígem loobakmang, kapeila delogei no ngom turmoto.

⁹⁴Ngo nokke, ngom iturtoyika; kapeila ngo nokke ngiitomem igedope ralto.

⁹⁵Mirul amie ngom petpe emla tobomdung. idakkom ngo nokke ayon ngiitomem míítíbomyé.

⁹⁶Atí takame iríko kadung dem ngo kaato, idola nokke ngiitomde apííne.

⁹⁷Edítko nokke ayon ngiitomem ngo ayadune! Si ngokke loodípe míítíbomname.

⁹⁸Nokke ngiitomsi miruem pemílo kényadope ngom bitung, legade si loodíke ngokkíng dung.

⁹⁹Luyilbona takamem pemílo ngo kényadung, kapeila ngo nokke ngiitomem igedung.

¹⁰⁰Mijing empemílo ngokke kénname bojéyadung, kapeila ngo nokke lulígem taddung.

¹⁰¹Atímana beleng takamem ngo mepakdung, kapeila ngo nokke agomem tatpe míídung.

¹⁰²Ngo nokke bisarem mepak sumang, legade no ngom luyilne.

¹⁰³Nokke agomde edítko tiidung ngamdune, de ngullang empemílo tiiyadung.

¹⁰⁴Nokke ayon ngiitomlok ngo kénnamem paadung, delok legape ngo menam yadnam bedangem belumdung.

¹⁰⁵Nokke agomde ngokke alelok merue, delokke ngokke bedanglokke angune.

¹⁰⁶Nokke aro luyilem igedope, ngokke pésunamem ngo bomgapyé.

¹⁰⁷Ngokke adírsi RUUTUM, pesorunampe idung; nokke pébisukampe ngom turmo toika.

¹⁰⁸Ngokke yidgenam amanem torík sutoika E RUUTUM, delokke nokke ngiitomem poyiltoika.

¹⁰⁹Ngo agínpe sinamem mííyam sudung, idakkom nokke ayon ngiitomem mitpan sumang.

¹¹⁰Mirul amie ngom batdope egum motung, ilate ngo nokke lulígem tatmape imang.

¹¹¹Nokke ngiitom kídíde ngokke agínpe yéyar bomsuname; dekede ngokke aang sokke ashénge.

¹¹²Ngokke simang tetengem nokke ayon ngiitomem igepe emla ngo mííyin sutung.

¹¹³Ngo aapí annyi genem belumdung, idola ngo nokke ayon ngiitomem ayadung.

¹¹⁴No ngokke rusi sukenge, delokke ngokke tamte; ngo nokke agomlo míínam sudung.

¹¹⁵Paab ina ami nolu ngokke lokke gígélangka, ngo Shédíke lulígem igeyé.

¹¹⁶Ngom ralnamem bika, nokke pébisukampe delo ngo turyé; nome míínam sukolo míngasumo mapeka!

¹¹⁷Ngom gagbom langka, delo ngo edíípe duuyé, delokke nokke polígem ngo agínpe tatgapyé.

¹¹⁸Nokke ayon ngiitomem igemana takamem no mepakdung; buluke yadnam agér kídíde emmume.

¹¹⁹No mirul ami takamem nyoruk yoppom kísape sandung, delokke depeila ngo nokke polígem ayadung.

¹²⁰Ngokke dínbínge nom pesuem petír gedung; nokke bisarem ngo pesodung.

¹²¹Ngo aronemlang ainem ito; ngom irééna kídílo melíkmayika.

¹²²Nokke béérangem igulyé emla no pébisulangka, míngkímsuna kídíem ngok teyolo iréé momayika.

¹²³Nokke turmona igulem kaatíkolo, delokke nokke deenampe pébisunamem apíí mopenamem kangkolo, ngokke amige kaayéme ikai.

¹²⁴Nokke duuyarna ayanglok nokke béérangem ibosutoika, delokke nokke ngiitomem ngom luyiltoika.

¹²⁵Ngo nokke béérange; nokke luyilem ngo tatkéndope ngom ngiitom toika.

¹²⁶RUUTUM si nokke beledíe, kapeila amikídíe nokke ayon ngiitomem igemang.

¹²⁷Delok legape ngo nokke ngiitom kídíem aiyalumna uunem pemílo moyék yadung.

¹²⁸Dekepeila nokke polígem ngo matadung; ngo imemna bedang takamem belumdung.

¹²⁹Nokke luyilde gairunako, delok legape ngo dekedem aapí-aang tabung lok igedung.

¹³⁰Nokke pobeng binam luyilde angun bidung, delokke kénmana amiem kénmodung.

¹³¹Nokke lulígem igelíngkolok ngo ngate ngane sudung.

¹³²Nom ayana takamem nokke inam kísape, ngokkíng ngébala ngom ayang toika.

¹³³Nokke pébisukampe ngokke lekorem edíímotoika, atímanem ngok teyolo duumo mayika.

¹³⁴Nokke tomlígem ngo igedope, ngom irééna kídílokke mopítoika.

¹³⁵Nokke mingmue nokke béérang teyolo angun langka, delokke nokke ayon ngiitomem luyiltoika.

¹³⁶Ngokke miksie korong kísape bíddung, kapeila amikídíe nokke ayon ngiitomem igemang.

¹³⁷E RUUTUM no yéjiine, delokke nokke bisarde arone.

¹³⁸Nokke binam ayonde apíí píílí arone, delokke berokne.

¹³⁹Ngokke marlínge eme kísape idung, kapeila ngokke mirue nokke polígem mínggemang.

¹⁴⁰Nokke pébisunamde berokrupe arokupene, edítko ngo dem ayadun!

¹⁴¹Ngo améngone, delokke míípakname, depe idakkom ngo nokke luyilem menyoksumang.

¹⁴²Nokke yéjiinamde agínpe duuyarpene, delokke nokke ayon ngiitomde arone.

¹⁴³Adír asongelang peso yiríe ngom duubomdung, idakkom nokke ngiitom kídíde ngokkíng ashéngem langaadung.

¹⁴⁴Nokke pogapnam kídíde agínpe tetene; ngom tatkén moyika, delo ngo turyé.

¹⁴⁵Ngokke aapí ainang tabulok nom ngo kabbisuto; ngom poyan subika E RUUTUM, ngo nokke lulígem igeyé.

¹⁴⁶Ngo nom tomdung; ngom mosiitoika, delo ngo nokke ayon ngiitomem igeyé!

¹⁴⁷Doonyi saamangada pekai iguldope nom ngo tomdung; ngo nokke agomlo míídasudung.

¹⁴⁸Nokke polígem míngííbompe emla, yoh rubungem keddola ngo dardung.

¹⁴⁹Nokke duuyarna ayanglok ngokke agomem tatbika, E RUUTUM, nokke yaasamem ngom lengkanla, ngokke turnamem megaplangka.

¹⁵⁰Ngom atírumape iréépena kídíe aanín dakbong; bulu nokke ayon ngiitom lokke mootedung.

¹⁵¹Idakkom no ngokkíng aníndung E RUUTUM, delokke nokke ngiitom takamde duuyarne.

¹⁵²Kerangopekai ngo nokke polígem kénto; no dekedem duuyarmoto.

¹⁵³Ngokke adírem kaasula ngom mopítola, kapeila ngo nokke ngiitom ayonem mepakmang.

¹⁵⁴Ngokke legangem aabosula ngom melen tolangku.

¹⁵⁵Mirul amikídíde turmayé, legade bulu nokke ngiitom ayonem igemang.

¹⁵⁶Nokke yaasamde botterune E RUUTUM; nokke míngkorpe ngom turnamem bika.

¹⁵⁷Ngokke mirue delokke irééne deddíko, depe idokom ngo nokke ngiitom ayonem igemape imang.

¹⁵⁸Míngkeng iruna edílo kayédí, ngo buulínge idung, kapeila bulu nokke polígem bomgapmang.

¹⁵⁹Míngkílangka edítko ngo nokke lulígem ayadun RUUTUM! nokke duuyarna ayang akorlok ngokke turnamem mosiitoika.

¹⁶⁰Nokke ayon ngiitom agíde arone, delokke nokke aro bisarde duuyarne.

¹⁶¹Tolna ralna amikídíe igíng kamape ngom iréédung, idakkom ngo nokke ngiitom ayonem mínggela dung.

¹⁶²Mirem kumsungem paanake ashénam kísape, edítko ngo nokke agomem ashébomdun.

¹⁶³Ngo menam yadnamem mepakdung, delokke belumdung, idola nokke ngiitom ayonem ngo ayadung.

¹⁶⁴Lemkínít kokai longelo ngo nom koyitdung, kapeila nokke bisarde deene.

¹⁶⁵Nokke ngiitom ayonem ayana kídíe botterupe mííponame kadung; ingkuete bulum ilet lamang.

¹⁶⁶Nokke mopít kupenamem ngo toyadung RUUTUM, delokke no ingkuem lulíktodí dem ngo idung.

¹⁶⁷Ngo nokke luyilem igedung; ngokke aapí tabung lok dekedem ngo ayadung.

¹⁶⁸Nokke lulík polígem ngo igedung; no ngokke inam takamem kaasudung.

¹⁶⁹Ngokke kabbi sunamem nokkíng píímo langka, E RUUTUM, nokke pébisukampe ngom kénmoyika.

¹⁷⁰Ngokke kumnamem tatbika; nokke agomlok ngom mopítoika.

¹⁷¹Ngo nom agínpe rínggeyé, kapeila no ngom nokke ngiitom ayonem luyildung.

¹⁷²Ngo nokke ayon ngiitomem miripe rínggeyé, kapeila nokke lulíkde tetene.

¹⁷³Agínpe ngom igulpe leemolangka, kapeila nokke lulíkde tetene.

¹⁷⁴Nokke mopít kupenamem edítko ngo míítíla duune, E RUUTUM; delokke nokke ngiitom ayonde ngokke ashéng séngkenge.

¹⁷⁵Ngom turmoyika, delomin ngo nom rínggeyéne. Nokke políge ngom igulyé.

¹⁷⁶Ngo mér nyokna kísape magoodung; nokke béérang ngom mata tokuika, kapeila ngo nokke ngiitomem menyok sumang.