Read Alladian MIRILUNGGU 132 Bible Online

MIRILUNGGU 132 - Alladian bible

MIRILUNGGU 132

¹E RUUTUM Dabidme míípa sulangka, delokke yényi yéso tabulo bíkke donggenamem mitpan sumapeka.

²Edítko bí RUUTUM me pébisutone, delokke Jakobke Tolna Shédíkíng sikepe pobeng subito.

³“Ngo ekumlo angkumayé, delokke ngokke ketpulo ketkumayé.

⁴Ngo apéémayé, demangkom ipmayé.

⁵RUUTUMke amongko, Jakobke Tolna Shédíke ekumko paamang tetengem.”

⁶Bethlehemlo ngolu Daapong Sonduk legangem tatto, delokke ngolu dem Jearim aríklo paato.

⁷Ngolu poto, “Ngolu RUUTUMke ekumlo gílaju, ngolu bíkke Roja paleng keralo kumsulaju.”

⁸Nokke tolnam ralnam kangkeng Daapong Sonduklo duula, Kumkeng Ekumlo aatola E RUUTUM, delokke so agínpe duuyartola.

⁹Miri kídíem yéjiinam agérem gérmolangka, delokke nokke amikídíem ashéng séngon molangka.

¹⁰Nokke béérang Dabidkíng no pébito, nokke ullennam rojem mepak mapeka, RUUTUM.

¹¹No Dabidkíng teteruupe pébisuto, dem pébisunamdem no laalat kumayé, “Ngo nokke oo akonem rojape imoyé, delo bí nokke méélamlo ruutum bomyé.

¹²Nokke oo kídíe ngokke daapongem bomgapmílo, delokke ngokke políknam luyilem erapmílo, buluke oo kídíekom rojape agínpe dunggeyé.”

¹³Legade RUUTUM bí Jayon díítem kooretung, bí dem agíke dungkepe míídung.

¹⁴“Simin ngokke agínpe apéé pekue, so ngo duuyé, kapeila ngo dem yébompe míídung.

¹⁵Ngo alummadope bipenamem bím biyé, ngo bíkke aatí opanem donamem biyé,

¹⁶bíkke mirikídíem turnana egem biyé, delokke bíkke amikídíe ashénge séngéyé.

¹⁷So Dabidke otínglok oo akonem rojape imoyé, so ngokke ullen sunam roja ayonem mesiisuyé.

¹⁸Ngo bíkke miru kídíem annying sumoyé, idakkom bíkke amongde agínpe jénam remname iyé.”