Read Alladian MIRILUNGGU 135 Bible Online

MIRILUNGGU 135 - Alladian bible

MIRILUNGGU 135

¹RUUTUM me ríngge langka! Bíkke amínem RUUTUMke béérang kídí nolu ríngge langka.

²RUUTUMke ekumlo daknakídí, ngoluke Shédíke Kumkeng Ekumlo dakna nolu, ríngge langka.

³Bíkke amínem miripe ríngge langka, legade bí aine, bíkke amínem miripe ríngge langka, kapeila bí ayanako.

⁴Kapeila RUUTUM Jakobme agíkepe ulsuto, Israelem agísukepe míísuto.

⁵Legade RUUTUM bí bottene, delokke ngoluke RUUTUM bí shédí takamke teyolo dung, dem ngo kéndung.

⁶Ingkuem RUUTUM bí míísadudí, depe bí taleng telolang amoso, siyéng lolang aane siyéng aralo idung.

⁷Bí among kéényulok gumnam doomugem langaatung; bí gumnam yaariem melíkdung, delokke bíkke kumsunglok asarem melendung.

⁸Ijiptlo bí tani oge yalumnam emlang taro oge yalum namem akampe petto.

⁹Delo rojem lang bík yébonam migom kídíem ingéénape bí irisinyo iyodem melíkto.

¹⁰Bí deddína opínem, delokke tolna ralna roja kídíem petpakto.

¹¹Amorit lokke roja Sihon, Bashan lokke roja Og, delokke Kaanan lokke roja takamem petto.

¹²Buluke amongem bí bíkke amikídílo bíto; dekedem bí Israel kídíem bito.

¹³E RUUTUM, nom Shédíe emla pogong geyé; siirum takamlo nom mitpan sumayé.

¹⁴RUUTUM bí bíkke amiem aabosuyé, bí agíke béérangem ayang míípasuyé.

¹⁵Angu amilokke shédí kídíde, arem delokke uunlok píname; bulu tanike alaglok píname.

¹⁶Buluke nappang kadungai, idola agom pomang; buluke amig kadungai, idola kaapamang.

¹⁷Buluke nyorung kadungai, idola tatpamang; bulu nappalok nganamkote ngamang.

¹⁸Dekepe dekedem mona kídíe, delo míídasuna kídídekom buluke monam mimang kídí delok akame!

¹⁹E Israel erang kídía RUUTUM me yidlangka, ríngge langka! Shédíke miri kídía.

²⁰E Lebike erang kídía RUUTUM me yidlangka! Bím kumsuna kídí nolu rínggelangka.

²¹Jirusalemlo duuna bím Jayon lokke rínggelangka! RUUTUM me koyitlangka!