Read Alladian MIRILUNGGU 139 Bible Online

MIRILUNGGU 139 - Alladian bible

MIRILUNGGU 139

¹E RUUTUM no ngom ankénto, delokke kénto.

²No ngokke iyi sisang takamem kéndung, mooteng lokkekai no ngokke mííyi míísangem kéndung.

³Ngo agér idudí imadí no kaadung; no ngokke iyi sisang takamem kéndung.

⁴Ngokke polenmang adape no ngokke popenamem kénto sudubong.

⁵No ngokke lamku kerang takamem duubomdung; no ngom nokke ralnamlok mopítdung.

⁶Sikepe nokke kénnamsi ngokkepe eerírune; si ngokkepe míípíng kénpí maname.

⁷Ingkolo ngo nokke lok duknyok geyéne? Nokke keralok ngo kape kísa gínyok gepene?

⁸Ngo teyong telo saamílokom no delo dung; uyu amolo yédokom no delo dung.

⁹Ngo alapgela sanggolokke yoplangala anggo kéényulo yopnyokla duudokom,

¹⁰deloteng nokke alage ngom gakbomyé, delokke lakbíklok ngom igulyé.

¹¹Kaamue ngom mittumtoika emdokom, demangkom ngom ngunkaana angune kaamope batdokom,

¹²kaamodete nokkepe kaamomayé, delokke yoh dete nokkepe angunpe iyé. Ruruk delang angunde nokkepe akamyé.

¹³Kapeila no ngokke arang amíl takamem píto, no ngokke ane akiilo duudungem písutsuto.

¹⁴Ngo nom koyiddung, kapeila no peso rupenamko; nokke inam takamde kangkí rumaname, delokke irisinyue. Ngo dem ngokke aapí ainang tabung lok kéndung.

¹⁵Edílo ngokke alongem pítodí, ngokke ane akiilo aipakpe alonge tupdum sutodí, edílo ngo delo asoope siitodí, ngo ane akiilo dung emnamdem no kénto.

¹⁶Ngom omang adape no ngom kaato, ngom binam longe kídíem, dekedem akone lenmang adapekai nokke kitablo atla metung.

¹⁷E Shédíe! Nokke míínamem ngo míípíng kírame! Edítko dekede reppi bomdun!

¹⁸Ngo dekedem sandomílo, dekede sulli empemílo bojéyadung, edílo ngo gerep dudí, delote ngo nokkíng dada dung.

¹⁹Edítko atímana mirukídíem no petpakyépe emla ngo míídun, E Shédíe, eríl erol ina amikídíe atí imape meduamílo, emla ngo edítko míídun!

²⁰Bulu atímana atíem nokkíng tuulíkdung; nokke amínem atímape bulu ludung.

²¹E RUUTUM edítko nom kangkina kídíem ngo kangkidun! Nom ipéésuna kídíem edítko ngo míípakdun!

²²Ngo bulum berokrupe kangkidung; ngo bulum agíke miru kísape míísudung.

²³Ngom ankang kílangka, E Shédíe, delokke ngokke aapíem kénlangka. Ngom ikangkíla ngokke míínamem kénlangka!

²⁴Ngokkíng atímanako kadudí dem kaalangka, delokke turyarpeko bedalok ngom gíbolangka.