Read Alladian MIRILUNGGU 145 Bible Online

MIRILUNGGU 145 - Alladian bible

MIRILUNGGU 145

¹Ngokke Shédí, delokke Roja nokke bottena amínem ngolu pogong geyé; ngo nom agínpe yidyaryé.

²Loodíke nom ngo koyityé; agínpe nom ngo yidgeyé.

³RUUTUM bí bottenako, delokke botterupe koyit penamko; bíkke bottenamde míípí manamko.

⁴No ingkuem itudí dem siirum konlokke siirum konloope yidgeyé; bulu nokke bottena agérem pogong geyé.

⁵Bulu nokke angun ralnamem, delokke migang miramem pogeyé, delokke ngo nokke irisinyo agérem míngíísuyé.

⁶Amikídíe nokke bottena agérem pogeyé, delokke ngo nokke bottenamem pogonggeyé.

⁷Bulu nokke ainam legangem pogeyé, delokke nokke ayangem miripe rínggeyé.

⁸RUUTUM bí ayanako, delokke yaasamnako, martu manako, delokke duuyarna ayange bíísétnako.

⁹Bí mipil miyonglo ainako, delokke bíkke pílennam takamem ayang míípasudung.

¹⁰Nokke pínam takame RUUTUM nom rínggeyé, delokke nokke ami takame nom yidgedung.

¹¹Bulu nokke yétalokke angun ralnamem pogeyé, delokke nokke ralnamem lupaayé,

¹²delo mipile nokke bottena agérem kényé, delokke nokke yétalokke angun ralnamem kényé.

¹³Nokke yébonam ayonde turyarne, delokke no rojape duuyarne. RUUTUM bí bíkke pébisunamem bomgapdung, delokke bíkke inam atí takamde aine.

¹⁴Bí ankí kenona kídíem iguldung; bí atung arééna kídíem gakrepdung.

¹⁵Turna takame nom míínamsula kaasudung, delokke no bulum buluke dolíyém donamem bidung.

¹⁶No buluke dotengem bila, bulum takam píídope bidung.

¹⁷RUUTUM bí bíkke agér takamlo deenampe idung, ayange bíkke agér takamlo dung.

¹⁸Bím gokna takamlo bí aníndung, sékobulu bím arope gokdudí.

¹⁹Bím mínggena kídíke míínamem bí bidung; bí buluke kapnamem tatla bulum mopítdung.

²⁰Bí bím ayana miyongem itum bodung, idola bí atímana mirul amiem inyokdung.

²¹Ngo agínpe RUUTUM me rínggeyé, bíkke pílennam turna atí takame, bíkke deena amínem agínpe ríngge daklangka.