Read Alladian MIRILUNGGU 147 Bible Online

MIRILUNGGU 147 - Alladian bible

MIRILUNGGU 147

¹RUUTUM me rínggelangka! Ngoluke Shédíme miripe rínggenamde ainame. Bím rínggenamde mííponamko, delokke ibaarunamko.

²RUUTUM bí Jirusalemem morep dungku, bí monpaknam amikídíem langaadungku.

³Bí aapí genyiinem míípo modoku, delokke buluke taríem éngkomdo.

⁴Bí takar kídíemte sanyintung, delokke takar miyongem amínlok gokdo.

⁵Ngoluke RUUTUM bí bottenako, delokke tolnako; bíkke kénnamdem míípí yimang.

⁶Bí dengomnem sangonmodo, idakkom atímana amiem amolo ippupe pudo.

⁷RUUTUM me rínggenam miriem lulangka, ngoluke Shédíkepe tapung miriem lulangka.

⁸Bí talengem doomugpe daklup modo, amosok legape pedongem iruubido, dííte mopalo neyangem saamodo.

⁹Simon siliem bí donamem bido, delokke paak ngangem kapyém adodem bido.

¹⁰Bí guré ralnamem ashéng bommang, miram sipayingemte unun bommang.

¹¹Idakkom bíkke duuyarna ayanglo míídasula, bím mínggena kídílomin bíkke ashéngde kadune.

¹²RUUTUM me ríngge langka E Jirusalem! Nokke Shédíme rínggelangka E Jayon!

¹³Bí nokke among yapgoem edíípe metung, bí nokke amikídíem lubéédung.

¹⁴Bí nokke among rísuem edíípe bomdung, delokke ardaruna gehulok gebíí sumodung.

¹⁵Bí tani amongem lulíkdung, delokke bí ingkuem lulíkyédí dem menape idung.

¹⁶Bí tapamem epu kísa pudo, delokke aapamem pemuk kísa gyamodo.

¹⁷Bí pedong tapíem boro boro omodung, bíkke ansing melíknamdem sékote dongge lamang!

¹⁸Delokrongem bíkke lulík dokuem, tapame yoldoku; bí asarem mutmodo, delokke asiem biimodo.

¹⁹Bí bíkke amikídílo agíke agomem, bíkke luyilem, delokke Israello ayon em melíkdo.

²⁰Bí opín abíd kídíem dekepe imang, bulu bíkke ayonem kénmang. RUUTUM me rínggelangka!