Read Alladian MIRILUNGGU 19 Bible Online

MIRILUNGGU 19 - Alladian bible

MIRILUNGGU 19

¹Teyong amonge Shédíke angun ralnamem pogedung, delokke ngun gonge bíkke alaglok pínam atíem pogodung.

²Lolope longe konlokke legangem pobidung; yohdíke yoh konlokke legangem pokan bidung.

³Delo agom kamang, agom popete pomang buluke adudem tatmang;

⁴depe ilate buluke adude tani gíída tabuso gígongkai, delokke buluke agome among kéényung miyonglo gígongkai. Doonyi kepe Shédí bí taleng telo dungkengko ibito.

⁵Si ruem ashéna makbo kísado, delokke dukdukna lokke dukkí sunamem erbomnam kísado.

⁶Si taleng kéényung konlok lenla kéényung konlo píídungku. Sokke pamkiem ingkolote rugepeko kamang.

⁷RUUTUMke Ayonde arone, aapíem ermokune; RUUTUMke ngiitomde míídííname, pííramna kídíem gyanem bine.

⁸RUUTUMke dormo Ayonde aine, aangem ashémone, ruulennake ngiitomde deene, amig aangem kangkén sumone.

⁹RUUTUM me pesola míngge namde ainame; de duuyarpene; RUUTUMke bisarde aroe, de imemmang.

¹⁰Dekede uun empemílo are kayane, gairuna uun empemílo mííbom yapename; ngullang empemílo tiiyane.

¹¹Dekede ngom, nokke béérangem kénsu modung; dekedem imílo botteruna amanem paadung.

¹²Idakkom agíke imemem séko kaadun? Kaapa manam imemlokke ngom arbíntoika, E RUUTUM!

¹³Iperung inam paablokke ngom mopítoika; ngokke teyolo bulum duubom momayika! Delomin ngo lupenam edo kamayéne, delokke atímana paablokke turyéne.

¹⁴E RUUTUM, ngokke lííne líírenge ngom iturne; ngokke nappang agomelang aapí-aanglok kumsunamsi nokkelo torík subape idaklangka.