Read Alladian MIRILUNGGU 22 Bible Online

MIRILUNGGU 22 - Alladian bible

MIRILUNGGU 22

¹Ngokke Shédíe, ngokke Shédíe, no kapeila ngom mepak kane? Ngo igultoika emla kapngésuto, idola dem supak pete paamang?

²E ngokke Shédíe, ngo longem kapdung idokom no tatbimang; delokke yumemte ngo kabbi sudung, idola remakpe duudí kamang.

³Idakkom no Israel lokke yidgename, Deena umkélo duune.

⁴Nokkíng ngoluke buku kídíe míídasuto; nom bulu míngkesuto, delo no bulum mosiito.

⁵Nokkíng kapkesula bulu turtoku; nokkíng bulu míídasula pesomato.

⁶Idola ngo tani yimang, ngo dongkale, amike belumname, delokke amikídíke mepakname.

⁷Ngom kaana takame ngilkadung, bulu ayue yopyalla, ngépak gedola ludung,

⁸“Bí RUUTUM me míída sudung; RUUTUM bím mosing yémangalo, bí bíkkíng aipe míídunade RUUTUM bím mopít yépemino.”

⁹Idola nomino ngom ane kiiralok turdope lenmotune, delokke ngokke ojiipe idungem no ngom iturto.

¹⁰Ngom orong kékonlokke ila ngo nokkíng míída sudung, delokke no agínpe ngokke Shédíe.

¹¹Ngokkelok mooteng mayika, kapeila yényinge píídak, sékote igul penayang kamang.

¹²Deddína mirue rubo rubam kísape, bulu takam ngom gargoodung. Bashan among lok migaana rubo rubam kísape idung.

¹³Buluke nappange myomur kísape kokala ngom kaadung.

¹⁴Ngokke ralname amolo asiem purpaknam kísape ikai. Ngokke along takame jonrík suyimang.

¹⁵Deemul kísape ngokke alíngsi erengkai, delokke ngok ayosi ngok sokkorlo kyamlíkkai. No ngom deemullo sidope melíktung.

¹⁶Kiibame ngom gargoodung; ngom atímana amieke opééko gargo bomdung; bulu ngokke alagemlang alem níkkéto.

¹⁷Ngo ngokke along takamem sansu ladung, bulu ngom kaatíla dung;

¹⁸ngokke ege galugem lotori sola buluke aralo orsuto.

¹⁹Idakkom E RUUTUM ngokke lokke mooteng mayika! Ngom mosingkupe menape aatola!

²⁰Yoksa arlokke ngom mopítoyika, sok ekii kídí sokke ngom mopítoyika.

²¹Ngom myomur nappalokke mopítoyika; Baamín kídí keraso ngo míngkén suyimang.

²²Ngo nokke inam takamem ngokke amikídílo pobiyé, buluke duusumlo nom rínggeyé.

²³RUUTUM bím mínggena nolu bím rínggelangka! Jakobke oo kídí takam nolu bím erkígelangka, delokke bím Israelke oo takam nolu eerípe pesolangka!

²⁴Kapeila bí opanem mepakmang, demangkom buluke adírem ankímape imang; bí bulu kelokke ngéngkur kumang, idakkom buluke iguldope kabbi sunamem tatbidung.

²⁵Baane gooralo nokke inam saanam takamem ngo rínggeyé; nom kumsuna kídí keralo ngokke pésunam amanem nom ngo biyé.

²⁶Opan kídíe dola kiidaryé; RUUTUMkíng aanade bím rínggeyé! bulu edíng ayar daklangka!

²⁷Angu opín takame RUUTUM me míípa suyéku. Among kéényung kereng lokke ami takame bíkkíng aayéku; opín erang kídí takame bím kumyéku.

²⁸Kapeila RUUTUM bí Roje, bí angu opín takamem yébodung.

²⁹Kekímpe míísuna takame bím kumsuyé; sipe nyokpena takame, agíem itursulamana takame bím kumsuyé.

³⁰Méélam yépena siirum kídíe bím kumyé. RUUTUMke legangem aapena siirumlo pobiyé.

³¹Omang adanam amikídílo poyé: “RUUTUM bí amikídíem mosiidung.”