Read Alladian MIRILUNGGU 31 Bible Online

MIRILUNGGU 31 - Alladian bible

MIRILUNGGU 31

¹E RUUTUM nokkíng ngo duusigepe aadung; ngom annying momayika, no yéjiina Shédíe, ngom laasitoika emla ngo kumdung!

²Ngom tatbika! Supak ngom mosing tokuika menarupe. Ngokke duusi gekeng líírepe itoika; ngom mosiina mimak yapgope itoika!

³No ngokke duusigeko yapgue delokke líírenge; nokke pébi sukampe ngom gíbola yéboika.

⁴Ngokke keralo gotosunam, ngom batpena lokke ngom mopítoika, gérma-paamolokke ngom duusi gemoi.

⁵Nokkíng ngo agíem melík sudung E RUUTUM, ngom no mopítyé, no arona Shédíe.

⁶Are kamana mimang kumsuna kídíem no akdung, idakkom ngodan nom míída sudung.

⁷Nokke duuyarna ayanglok ngo mííyum sueku ashéngeku iyé. Kapeila ngokke adírem no kaato; ngokke ankí-kenuem no kénto.

⁸No ngom miru alaglo melíkmang, no ngom mínggípe yémoto.

⁹E RUUTUM, ngom ayang toika, kapeila ngo míídír sudung; ngokke amigem mikbíng kabbísuto; ngo bengal alongkai.

¹⁰Ngo míídíre séngéédung, kapkolok ngokke yépename lootungkai. Ngokke adír asong takame, ngokke amílem soomodung, ngokke along kídíete yumdung.

¹¹Ngokke miru kídíe, apekrupe kumrí kídíe, ngom kangkipe kaadung, ngom kénna kídíe ngom pesolatkai; bedalo bulu ngom kaayém duggedoku.

¹²Mipile ngom sina kísape mepakto; ngo yoppaknam atí kísape ikai.

¹³Mirue deddíko ngom lugenem taddung, rego mipílo irítpene dung. Bulu ngom akla atíeke mííru bosudung, ngom petpe emla ruubosudung.

¹⁴Idakkom E RUUTUM, ngo nom míídíísudola podung, “No ngokke Shédíe.”

¹⁵Ngo agínpe nokke gooralo dung, ngokke miru lokkelang ngom aknalokke mosing toika.

¹⁶Nokke béérang teyolo, nokke mingmo angunem ngunkamola, nokke duuyarna ayalok ngom mopít toika.

¹⁷E RUUTUM, ngo nom gokdung, ngom annying momayika. Mirul amikídíem annying molangka; bulum tani among nyokkolo asoope nyoktak sumotoika.

¹⁸Mena-yadna, míngkímsuna, yéjiinem kangkina amikídíem lutum langka.

¹⁹Nom pesogena kídí legape nokke mesii binam atí kídíde edítko aidun. Edítko aidudí no dem takam kéndung, nokkíng míídasuna amikídíem no edíírupe yébodung.

²⁰Tani míírí míínyolokke no bulum nokke dungkolo edíípe metung; miru kídíke iréé pekolokke aina notkolo no bulum leetung.

²¹RUUTUM bím koyit langka, ngom mibue gargoola ruabomduem, deddíko bíkke ayangem ngom lengkanto.

²²Ngo pesodola míísutuai, nokke keralok, “Ngom leepak sutoku,” emla. Idakkom no ngokke igultoika, emla kabbi sunamem tatbito.

²³RUUTUM me, nolu míngkesuna takame ayalangka. RUUTUM bí míngkesuna kídíem mosiidung; idola míngkím sunem akorem kaabomdola ingéédung.

²⁴Edíílangka, delokke miram langka. RUUTUM lo míínam suna nolu takam.