Read Alladian MIRILUNGGU 33 Bible Online

MIRILUNGGU 33 - Alladian bible

MIRILUNGGU 33

¹Nolu deenampe yéna takame, RUUTUMke inamem kaala ashélok erlangka! Bím mínggena takam nolu koyit langka.

²RUUTUM bím tapung gaayolok koyit langka, tapung gaayolok tatpona miriem bíkkíng lubilangka.

³Bíkkepe aní miriem lubilangka, tatporuna tapung konggangem manlangka.

⁴Kapeila RUUTUMke agomde arone, delokke bíkke agér takamde míídíísukenge.

⁵Bí deenam ayonemlang tetengem míídung; tani amosim RUUTUMke duuyarna ayange bííbomdung.

⁶RUUTUMke agomlok teyong amongem píto, doonyi, poolo, takaremte bíkke agomlok píto.

⁷Bí siyéng asiem engkol atello eedum sumodung, Bí siyéng aanem engkol atello eedum sumoto.

⁸Among tabunge, RUUTUM me pesolangka, tani gíída sokke amikídíe bím mínggelangka.

⁹Kapeila bí kape potodí, tani gíídangem dekepakpe píto, bíkke lulíklok takame lenkai.

¹⁰RUUTUM bí opínkídí lokke míínamem, míínampe imomang, amikídí lokke míínamem bí míídulok imomang.

¹¹Idakkom RUUTUMke míínamde duuyarne. Bíkke mííbom namde siirum takamlo duuyarne.

¹²Sékoke Shédípe RUUTUM bí idudí, de opínde gérne, bíkke ullennam ami kídíde gérne!

¹³RUUTUM bí teyong telok kaatok sudung, ami takamem kaadung.

¹⁴Ingkolo bí rojape duubodudí, delok bí tani amoso duuna takamem kaangí sudung.

¹⁵Bí buluke míínam takamem pílenne, delokke buluke inam takamem kéndung.

¹⁶Rojade bíkke sipaying ralkolok ikummang; sipayingde agí ralnamlok ikummang.

¹⁷Mimak ina gurélok atí ikum nalamang, buluke miga miramlok bulu agíem ipí sulamayé.

¹⁸Kaalangka, RUUTUMke mingmue bím mínggena kídílo dung, bíkke duuyarna ayanglo míínamsula duuna kídílo bí duudung.

¹⁹Bí bulum sinam lokke mosiidung; bí bulum dírí kenolo simomang.

²⁰Ngoluke aide RUUTUM me míínam sula dung, bí ngoluke tamte, delokke igulne.

²¹Bíkke legalok ngolu mííyum sudung, ngolu bíkke deena amínlo míída sudung.

²²E RUUTUM, nokke duuyarna ayangem ngolukíng duumotoika, kapeila ngolu nokkíng míínam sudung.