Read Alladian MIRILUNGGU 37 Bible Online

MIRILUNGGU 37 - Alladian bible

MIRILUNGGU 37

¹Loorímana ami legangem míídír sumangkom; imemna ami kídíem nesumangkom.

²Bulu sanléna ííng kísa menape nyokyéku; bulu sanpakna amum kísa siyéku.

³RUUTUM bíkkíng míída sulangka, delokke ainem ilangka; delomin nolu pébisunam amonglo duula edíngem paasu yékune.

⁴RUUTUM kíng noluke ashéngem matalangka, delo bí noluke aapí míínamem biyéku.

⁵Nolu agísue RUUTUM kíng melík sulangka; bím míída sulangka, delo bí agérem gérsuyé;

⁶Bí nokke yéjiinam agérem doonyi kaadung angun kísape ngunkan sumoyé.

⁷Mínggapla dongge langka, delokke RUUTUMke agérem toyalangka; mirem remsaana kídíem kaala míítí mínmapeka, míírí-míínyo agér ina kídíemkom kaala míítí mapeka.

⁸Míídír sumapeka, demangkom marmapeka; de yényi-yéso modung.

⁹Kapeila RUUTUM bím míídasuna de amongem duubomyé, idola loorímana ami kídíem monpakyé.

¹⁰Loorímana kídíe menape nyokyéku; nolu bulum matayépe, idola nolu bulum paayimayé.

¹¹Dengomne amongem duubomyé, delokke jénam-remnamem paayé.

¹²Loorímana amie aina amiem míírí-míínyo bomdung, delokke naptam bomdung.

¹³Idakkom RUUTUM bí loorímana bulum ngilkadung, kapeila bulum menape nyokmoyé, dem bí kéndung.

¹⁴Loorímana ami kídíe opan mimana kídíem, delokke aina ami kídíem petpe emla agí yoksem sadsula, delokke iyyiem hogar bomdung.

¹⁵Idakkom bulu agí yoksalo siyé, delokke buluke iyyiem dírmík biyé.

¹⁶Aina ami lokke anyongo bomnamde loorímanake bojépe bomnam sérang takamem are kayadung,

¹⁷kapeila RUUTUM bí loorímana kídíke ralnamem leepak biyé, idola aina ami kídíem tosiiyé.

¹⁸RUUTUM bí bím mínggena kídíem kaabomsudung, delokke amongdem agínpe bulu duuyarbomyé.

¹⁹Asi among atímado longelo bulu adírmayé, lomdo longelo bulu pííram mayé, dírí-keno longelo bulu alummayé.

²⁰Idakkom loorímana ami kídíde siyé; RUUTUMke miru kídíde appun kísape nyokyéku; bulu míkkí kísape gyanyokyéku.

²¹Loorímana amide nargeyéla bilat kuyimang; idola aapí deena amide aman bitaksula bidungku;

²²RUUTUMke lubéélíknam kídíde amongem duubomyé, idakkom bíkke béénam kídídem mepakyéku.

²³Taniem RUUTUM bí bíkke gípekuem ruulíkdo, delokke bím mííyum sumonadem bí isii-mosiido.

²⁴Bí olet dokom ketyar mayé, kapeila RUUTUM bí bím igulyéku.

²⁵Ngo yaamépe yénamem yétuai, idola supak ngo mijingkai, idakkom RUUTUM me aina amikonem mepakdope kangkímang, demangkom bíkke ome-uem donam kogoodope kaamang.

²⁶Yénam takamlo bí bidarpe bidung, delokke akonem bipoodung, delo bíkke ome-oo kídíde gérdung.

²⁷Atímana lokke gígéé langkula ainem itoka, delo nokke ome-ue among delo agínpe duuyé;

²⁸kapeila RUUTUM bí jonnem aipe míídung, delokke bíkkelo míngkesuna kídíem mepakmang. Bí bulum mosiidung, idakkom loorímana kídílokke ome-oo kídíem monpakyé.

²⁹Deenampe yéna kídíde among dem duubomla duuyar bomyé.

³⁰Deenampe yéna amide gyan ayonem podung, delokke bí jonna agomem poyardung.

³¹Bíkke Shédíke ngiitom ayone aanglo dung, delokke bí angupe imang.

³²Loorímana amide aina amiem matala, bím petpe idung;

³³idakkom RUUTUM bím miru alaglo melíkmayé, delokke bím gusor idolokom bím ingéémayé.

³⁴RUUTUM me míídasula duulangka, delokke bíkke ngiitomem tatlangka; bí ashéngla nom amongem duubomdope biyé, delo no loorímana kídíem monpak tungkupe kaayé.

³⁵Ngo loorímanako kaníídope leko paato; bím ngo Lebanon lokke sidar esing kísape mipilem tarlum bomdope kaato.

³⁶Idola ngo méélam dem gípat kuname, delo bí duuyimang; ngo bím matatuai, idola ngo bím paamang.

³⁷Aina amiem kaasutoka, mipíína amiem kangkítoka; sikena amie yéyinlo yéponamem paadung.

³⁸Idakkom paabna kídíem petyinyé, delokke buluke otíng-oyinem nyokyinmoyé.

³⁹Deenampe yéna lokke turku penamde RUUTUMkelo dung; ebín-ebon ido moodílo, bí buluke duusi sukenge.

⁴⁰RUUTUM bí bulum iguldo, delokke laasidoku, bulum miru ami lokke mosiido; kapeila bulu bíkkíng duusi gedung.