Read Alladian MIRILUNGGU 38 Bible Online

MIRILUNGGU 38 - Alladian bible

MIRILUNGGU 38

¹E RUUTUM, nokke marlílok ngom lumapeka, delokke ingéé mayika.

²Nokke epuklok ngom tarí apketto, delokke nokke alaglok ngom kítto.

³Nokke markolok ngo songgedung, ngokke paablok ngokke amílsi miin gedung.

⁴Ngo paab siyénglo jiilumdak, de ngokke gelamanam egetpe idung.

⁵Ngo miderupe yéto, ngokke taríe dosige ito.

⁶Ngo lebíng koníngto, ngom ingato, ngo lolope ankí kenola yéto.

⁷Ngo kisaala pamkie séngééto, ngo sitapakto.

⁸Ngo midínpe yéto, delokke bengalto; ngokke aangsi míídírla, kinamem ngo sigín geto.

⁹E RUUTUM, nom ngokke ankí kítínamem no kénsudung, no ngokke sigín takamem taddung.

¹⁰Ngokke aapí si pokdung, ngokke tolnam kaimang, delokke ngokke amig pauarete gíkai.

¹¹Ngokke angong arum kídíe ngokkíng gímín yimang, ngokke edung erangete ngokke lokke mootedung.

¹²Ngom petpe míína kídíe, ngom agotlo tobomdung, delokke ngom tarí iketpe mííne, ngom nyokdope irítdung. bulu ngom mokape emla meyimape itíbomdung.

¹³Idakkom ngo ruubéna kísa tatpamang, agom pokénmana mide kísa idung.

¹⁴Ngo tatpamana, delokke poyan sumana ami kísa.

¹⁵Idakkom RUUTUM nom ngo míídasudung; E RUUTUM ngok Shédí, nomin ngom pobiyéne.

¹⁶Miruem ngokke adír teyolo ngilman momayika; ngokke oletko teyolo bulum adum-ale imo mayika;

¹⁷Ngo olet dakbong, ngo míídír sutídung.

¹⁸Ngo ngokke imemem pokan sudung, ngokke paabem ngo bursudungku.

¹⁹Ngokke mirukídíe toldu raldung; ngom akgíng kamape aktíne deddíko.

²⁰Ainam legalo atímape iyansuna kídíde ngom akdung, kapeila ngo ainem ipe míídung.

²¹E RUUTUM, ngom mepak sumayika! E ngokke Shédía, ngokke lokke mooteng mayika!

²²E ngom mopítna RUUTUM, ngom supak menape igultoika!