Read Alladian MIRILUNGGU 41 Bible Online

MIRILUNGGU 41 - Alladian bible

MIRILUNGGU 41

¹Aatí-opanna kídíem ankínade gérne! RUUTUM bí bulum ankí-kenolo igulyé.

²RUUTUM bulum mosiila turdope meyé; bí bulum among delo ashéngpe duumoyé; bí bulum miru pauar gooralo melíkmayé.

³RUUTUM bí bulum kiduemte igulyé, delokke buluke kina amílem ipíyéku.

⁴Ngokke pedan ngo sikepe poto, “E RUUTUM, ngo nom ipéésuto, ngom ayala ipí tokuika.”

⁵Ngokke miru kídíde ngom aklíla poto, “Edíloi bí siyéne, edíloi bíkke amíne nyokyéne?”

⁶Ngom kaangana kídíde aromangeke, bulu ngom atímana mílípe lugedung, delokke gígoola dem rego mipílo pogedung.

⁷Ngom nena pona kídíde, buluke aralo ngok legangem lugedung, bulu ngom atírumape iyépe emla míídung.

⁸Bulu podung, “Bí sige-nyogge nana kinamko kikai; bí ketko lokke gerep yimayé.”

⁹Ngokke míída sunam, ngokke ekung atello dobosunam, ngoojung pagete ngom aksu dungku.

¹⁰Idakkom E RUUTUM ngom ayatoika, ngokke amílem aimotokuika, delo ngo ngokke miruem iyan suladokupe.

¹¹Ngokke mirue ngom ikummang, sokmin ngo nokke ngom aipe míínamem kénsudune.

¹²No ngom igulyé, kapeila ngo aina atíem idung; ngom nokke keralo agínpe meyé.

¹³RUUTUM me, Israelke Shédíme, supak lokke ila yéyin loope ríngge langka! Bím ríngge ayar langka! Amen! Amen!