Read Alladian MIRILUNGGU 45 Bible Online

MIRILUNGGU 45 - Alladian bible

MIRILUNGGU 45

¹Ngo sim mirisim rojakepe atyéname, airuna agomeke ngokke aapísi dungkai. Atjiina lokke atnana kísape ngokke nappasi miriem luladung.

²Nomin tani kídí lokke kampo yalumnemte kampoyane, no abéé lujiinako, Shédí bí nom agínpe lubéé líkdung.

³Tolna roje, nokke yoksem tulík sutola; no erkíname delokke kekímne.

⁴Kekímrupe, ikumdope aro emlang tetengem bomgapnape dareptola, nokke ralname botterupe nom ikumboyé.

⁵Nokke yokmode ratne, de nokke miru kídílokke aangem patkédung.

⁶Nokke roja palengde duuyarpene, no nokke amikídíem tetelok yéboyéku;

⁷no aina atíem ayadung, delokke atímanem belumdung. Delok legape Shédí, nokke Shédí bí nom ullentung, delokke nokkíng abíd rojem pemílo aiyana ashéngem bitung.

⁸Nokke egedelo mir, delokke aloi namporuna atíe kadung; leesi-leemonam roja dungko delo tapung konggange, nom erap modung.

⁹Míngge penam nokke mime gooralo yéna kídíde rojalokke ome kídíe, delokke nokke roja palenglok lakbík delo gairuna uun lungguem gela roja mime dakdung.

¹⁰E ome, tatgaplangka, ngokke ponamem tadíítola; nokke ami kídíemlang nokke ali-atod em mepak sutolangku.

¹¹Nokke kamposude rojem mííbang modung; bí nokke ruutume, iname bík agomem tatlangka.

¹²Tur lokke ami kídíe nom aman bila ashéngmoyé, mirem amikídíe nokke mííba namem matayé.

¹³Roja ome uunlok sumnam egem gela roja ekumlo dung! Edítko bí kampodune!

¹⁴Benyi-benyona egem gemola bím roja dungkolo gílíkdung, delo ayonpe bím igulna mime kídíete bím gíguldo.

¹⁵Ashéng-angame ilangala bulu roja ekumlo aato.

¹⁶Ngokke roja no, nokke buku kídí rojem dogepena ue bojéko lenyé, delokke no bulum tani among tabung sim yébodope ilíkyé.

¹⁷Ngokke mirisi nokke amínem turyarmoyé, delokke mipile yépenam tabunglo nom rínggeyé.