Read Alladian MIRILUNGGU 50 Bible Online

MIRILUNGGU 50 - Alladian bible

MIRILUNGGU 50

¹Tolya yalumna Shédí, RUUTUM bí podung; bí tani among tabungem sanggo lokke ila anggo loope gokdung.

²Aropakpe kampona Jayon delok Shédí bí bíkke angunem ngunkanto.

³Shédí bí aadakku, asoope duumang bí, bíkke keralo gupena eme dung, bíkke ampengde kaníína gumname.

⁴Bí teyong among emlang tani amongem, bíkke ami kídíem bisarnamem hakii bidope tomdung.

⁵Bí podung, “Ngokkelo míngkesuna kídíem palíknam ipak amanem bila ngom daapong mobosuna kídíem, ngokkíng laadum sutoka.”

⁶Shédí bí deene, bí agíe bisarne emnamdem teyong amonge pobidung.

⁷“Ngokke ami kídíe tatgaptola ngo pobiyé. E Israel, nolum ngo atímape luyé. Ngomin Shédíe, noluke Shédíe.

⁸Noluke palík-ilíknam delok ngo edo lumang, noluke rombunam ipakde ngok keralo kayardung.

⁹Depe idola nokke ekumlok ngo gooru míímang, demangkom nokke bénbamlok ngo sobén míímang.

¹⁰Moonamlok simon-sili tabungde ngokke, delokke éjar éjar díítelo yéna simonde ngokke.

¹¹Moonamlo yopgoona pettang, delokke amolo turna atí takamde ngokke.”

¹²“Ngo keno duamílo, nolum ngo pomayai; kapeila tani among, delokke so duuna takamde ngokke.

¹³Ngo gooru adínem doyénía? Demangkom sobén iyyiem tííyénía?

¹⁴Noluke sobo-yare amandem Shédíme yidgenam lok ilangka, delokke Tolya yalumna bíkkepe noluke pésunam takamem ilangka.

¹⁵Noluke ankí-adír dolo ngom goklangka; delo ngo nolum mopíyé, delo nolu ngom yitgelangka.”

¹⁶Idakkom loorímana amiem Shédí bí podung, “No kapeila ngokke ngiitomem aapílo geyéne? Ngokke daapongem kapeila no pogeyéne?

¹⁷Nom ngokke ijon namem no tatpakto, no ngokke ngiitomem mepakto.

¹⁸Doppyona kaanam takamem no angong ipe míídung, delokke abír ina kídílo yébosudung.”

¹⁹“No atímana agomem poyarlípe míídung; no menam yadnamem ponyomang.

²⁰No nokke bíro kídíem ajéng luket lídung, delokke bulukíng imemem tolíkdung.

²¹No sim tabung sim ito, idola ngo atí lumang, dekepe ila ngom noluke kísape no míítuai, idakkom supak ngo nom lula atísim nom lupenamem lengkandung.”

²²“Demílo sim no kén-ge sulangka ngom mepaksuna kídíe, demamílo ngo nolum petpakyé, delokke delo sékote nolum mopítkuna kamayé.

²³Ngom mínggena kídíde, buluke amanem ngom yidnamlok idung, delokke ngom mínggenadem berokpe ngo mopítyé.”