Read Alladian MIRILUNGGU 51 Bible Online

MIRILUNGGU 51 - Alladian bible

MIRILUNGGU 51

¹Nokke duuyarna ayang akorlok, E Shédía, ngom yaasamtoika. Nokke alummana yaasame, ngokke paabem ipak ladung.

²Ngokke yémem sunamem apíípe arbíntoika, delokke ngokke paablok ngom deemokuika!

³Ngo ngokke imemem kénsudung; ngo ngokke paabem agínpe ansudung.

⁴Ngo nomrung ipéésula paab ito. Dekepe iname ngom nokke bisarde imemmang, no ngom mepakde ibadung.

⁵Ngom odo delokkekai ngo atímanako; odo delokkekai ngo paabnako.

⁶Ardanam emlang aronamem no míídung, ngokke aapíso nok gyanem bíísét motoika.

⁷Ngokke paabem laapak toika, ngo deedokupe; tapamem punyadope ngome írbíntoika.

⁸Ngom ashéng-angam, delokke írga-muangem tatsumokui, no ngom bengaldope iduakom, ngo lekoda ashéngkupe míídung.

⁹Ngokke paabem no kaasu mayika, delokke ngokke imem takamem moltít toika.

¹⁰E Shédía, ngom aní angko bitoika, delokke ngokkíng aní aidko bitokuika.

¹¹Nokke keralok ngom menyok mayika, nokke deena aidem ngokkelok laabín kumayika.

¹²Nokke turnamlok lenna ashéngem ngom bitoika, delokke nokke tomlígem taddope, ngom aapí essangem bikuika.

¹³Delo ngo nokke luyilem paabna kídílo pokanyé, delo bulu nokkelo aayéku.

¹⁴E Shédía, ngokke turkeng Shédía, apmem-pamem pekolokke ngom mopít toika, delo ngo nokke deena agérem pogong geyé.

¹⁵E RUUTUMe, no ngokke nappangem pomotoyika, delo ngo nom rínggeyé.

¹⁶No sobo palíknam ipagem míímang, ngo dekedem bituakom no rombunam ipaklok ashéng gemang.

¹⁷Aapí remak demin Shédíke mííbanam sobo-yare; E Shédía, mínggípsula bursukuna aangdem no mepakmayé.

¹⁸Jayonem ayala no igultoika; Jirusalem lokke yapguem morep tokuika.

¹⁹Delomin no sobo pabinamem, delokke ngoluke rombunam ipagem ashéla, delokke gooruem nokke deena runggulo palíkdope iyéne.