Read Alladian MIRILUNGGU 59 Bible Online

MIRILUNGGU 59 - Alladian bible

MIRILUNGGU 59

¹E ngokke Shédía, ngokke miru kídí lokke ngom mopít toyika; ngom ruabompenem itum toyika!

²Atímape agér ina kídí lokke ngom mosing toyika; petna mona ami kídí lokke ngom laasi toyika!

³Kaatola! Bulu ngom petpe emla tobomdung; kaníína ami kídíe ngom gídum subomdung.

⁴E RUUTUM, si ngokke imem-samem kolokmang, demangkom ngokke imem atí ikolok buluke dukdum sunamde imang, E Shédía.

⁵RUUTUM, Tolna yalum Shédía, ngom igulkape aatoboika, no Israel lokke Shédíe emla lengkan sulangka. Gerepla mipak ami kídíem ingéélangka; atímana agérem ertíbomna kídíem yaasam madak langka.

⁶Yume adengem aalat langkula, kiibam kísa bulu magoodung.

⁷Buluke gomké gommuem tatkítoka, asum-aar kana gomké gommue buluke nappalo dung, depe idokom bulum ami tatmang, emla bulu míídung.

⁸Idakkom E RUUTUM, no bulum ngilkadung; No shédí kamana takamem lukadung.

⁹Ngo nokke tolnamlo míídíng abuusudung; E Shédía, nomoko ngokke dungkenge.

¹⁰Ngokke Shédí bí ngom ayadakla ngokkíng aayé, ngokke miru kídíem ngo ikumdope bí kaamoyé.

¹¹E RUUTUM, ngoluke tamte! Bulum petmapeka, demamílo ngoluke ami kídíe mitpan supelo. Bulum pitpan sumotoka, nokke ralnamlok bulum ikumlangka.

¹²Paabde buluke nappalo duusudung, buluke agom takamde paabsue; agíem kekímpe míísukolo bulu olík sudaklangka.

¹³Kapeila bulu medula béédung, nokke marlílok bulum apíípe yumpak molangka; demílomin Shédí bí Israelem yébodung, delokke tani amosim ruutum bomdung emla kényéne.

¹⁴Doolunglo kiibam duggona kísape, ngokke miru kídíe yumem aalatbomdung.

¹⁵Donam magoola delo elo ekii kísape gígoodung delokke kiidar mamílo duutíbomdo.

¹⁶Idakkom ngo nokke ralnamem rínggeyé; rodíke ngo nokke duuyarna ayangem bottepe rínggeyé, No ngokke tamtepe ito, ebínlo ngokke duusi sukepe ito.

¹⁷Ngokke dungkede Shédí bí, ngom ayana Shédí bí ngokke yapgue, ngo nom rínggeyé.